ՄԱԿ-ում ԱՄՆ մշտական ներկայացուցիչ Սյուզան Ռայսն այսօր սենատորների առջև բացատրություն կտա սեպտեմբերի 11-ին Լիբիայի Բենղազի քաղաքում ամերիկյան հյուպատոսության վրա հարձակման վերաբերյալ իր արտահայտությունների համար: Այս մասին հայտնում է RIA Novosti-ն: Հարձակման հետևանքով զոհվել էր Լիբիայում ԱՄՆ դեսպան Քրիստոֆեր Սթիվենսը, դեսպանատան աշխատակիցը և երկու նախկին հատուկջոկատայիններ:
Հիլարի Քլինթոնից հետո պետքարտուղարի պաշտոնի հավանական թենածու Ռայսի վարկանիշը լրջորեն տուժել էր հարձակման մասին իր արտահայտություններից հետո: Նա հայտարարել էր, որ ողբերգությունը տեղի է ունեցել ինքաբուխ, ֆիլմի դեմ ակցիան սկզբում խաղաղ բնույթ է կրել, և որ կատարվածն ահաբեկչություն չէ: Ավելի ուշ, ազգային հետախուզության տնօրենի գրասենյակը հաղորդել էր, որ միջադեպը ծրագրված ահաբեկչություն է: Այդ ժամանակ Ներկայացուցիչների պալատի և Սենատի հանրապետականները հայտարարել էին, որ կանեն ամեն ինչ, որպեսզի ՄԱԿ-ում ներկայացուցչությունը դառնա Ռայսի կարիերայի վերջին կետը: Իր ենթակայի պաշտպանությամբ հանդես էր եկել ԱՄՆ նախագահ Բարաք Օբաման:
«Ռայսն այս շաբաթ կհանդիպի սենատորների հետ: Հանդիպմանը, որը կկրի ոչ պաշտոնական բնույթ և կանցնի Սենատի միջազգային կոմիտեի պատերի ներքո, կմասնակցեն երկու կուսակցությունները ներկայացնող առնվազն 6 սենատորներ, ինչպես նաև ԿՀՎ ղեկավարի լիազորությունները կատարող Մայքլ Մորելը»,- հաղորդում է Hill թերթը՝ հղում անելով Կոնգրեսում սեփական աղբյուրներին:
Սենատոր Քելլի Այոտը պարբերականի հետ հարցազրույցում հստակեցրել է, որ նման հանդիպումը ծրագրված է երեքշաբթի առավոտյան, և ներկայում իրենց մասնակցությունն են հաստատել հանրապետական սենատորներ Ջոն Մաքքեյնն ու Լինդսի Գրեմը:
«Մենք ցանկանում ենք իմանալ, թե ինչի՞ մասին է մտածել նա նման հայտարարություն անելիս: Ես արդեն ասել եմ, որ ես խոչընդոտելու եմ նրա հաստատմանը մինչ այն պահը, քանի դեռ մենք հստակ պատասխաններ չենք ստացել և դրանց հիման վրա եզրակացություններ չենք արել»,-հավելել է Այոտը:
Նոյեմբերի 20-ին, ԱՄՆ-ի Կոնգրեսի Ներկայացուցիչների պալատի շուրջ 100 հանրապետականներ արդեն նամակով դիմել են Բարաք Օբամային՝ Ռայսին պետքարտուղարի պաշտոնում չառաջադրելու խնդրանքով: