Կենտրոն և Նորք-Մարաշ վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ սկսվում է Արմեն Սարգսյանի գործի դատական քննությունը:
Ըստ մեղադրանքի՝ 2012 թվականի օգոստոսին 41-ամյա Արմեն Սարգսյանը ծանոթացել է պայմանագրային զինծառայող Էդգար Ս.-ի հետ:
Արմեն Սարգսյանը կեղծ տեղեկություններ է հայտնել Էդգարին, թե 4 հազար դոլարի դիմաց կարող է լուծել նրան՝ բնակավայրին մոտ զորամասում ծառայության տեղափոխելու հարցը, որովհետև իր հարևանը, իբր, ՊՆ բարձրաստիճան պաշտոնյա է, ինքն էլ այդ հարևանի հետ մտերիմ հարաբերությունների մեջ է:
Էդգարը համաձայն է եղել բնակավայրին մոտ զորամասում ծառայելուն, սակայն 4 հազար դոլարը միանգամից տրամադրել չի ցանկացել:
Առաջարկել է 2 հազար դոլարը տալ սկզբում, իսկ գործը գլուխ գալուց հետո տալ մնացած երկու հազար դոլարը:
Արմեն Սարգսյանը մի քանի օր չի ընդունել Էդգարի առաջարկը, հայտնել է, թե հարևան բարձրաստիճան պաշտոնյան այդ ձևով գործը չի անի:
Մի քանի օր հետո, այնուամենայնիվ, Արմեն Սարգսյանը Էդգարին հայտնել է, թե հարևանի հետ պայմանավորվածություն է ձեռք բերել, նրան խնդրել ու համոզել է, որ չորս հազար դոլարը երկու փուլով ստանա՝ սկզբում ու գործն անելուց հետո:
Արմեն Սարգսյանը խաբեությամբ Էդգար Ս.-ին գցել է մոլորության մեջ, համոզելու, հորդորելու եղանակով նրան դրդել է երկու հազար դոլար կաշառք տալու փորձ կատարելուն:
2012 թվականի օգոստոսի 24-ին Էդգար Ս.-ն իր մայրիկի միջոցով Արմեն Սարգսյանին է փոխանցել պահանջված 2 հազար դոլարը, որը Սարգսյանը խարդախությամբ հափշտակել է:
Արմեն Սարգսյանի խափանման միջոցը կալանավորումն է: