Սիրիայի կառավարական օդուժի հարվածների հետևանքով Դամասկոսից 12 կմ հեռավորության վրա գտնվող, ապստամբների կողմից վերահսկվող Դեյր Ալ-Ասաֆիր գյուղում զոհվել է 10 երեխա: Այս մասին հաղորդում է Reuters-ը՝ վկայակոչելով Սիրիայի հակակառավարական շրջանակներին:
Հաղորդվում է, որ կառավարական օդուժի հարձակման ժամանակ Դեյր Ալ-Ասաֆիրում ոչ մի գրոհային չի եղել:
Քաղաքացիական ակտիվիստների հաղորդագրությունների համաձայն՝ կառավարական ավիացիան կիրառել է կասետային ռումբեր: Դրանց կիրառումն արգելված է հատուկ միջազգային կոնվենցիայով, սակայն Սիրիան, լինելով այս տեսակի սպառազինման խոշոր արտադրողներից մեկը, չի ստորագրել այդ կոնվենցիան:
Սիրիայի իշխանությունները որևէ կերպ չեն մեկնաբանել երեխաների զոհվելու մասին հաղորդագրությունները, իսկ երկրի պետական ԶԼՄ-երը նշում են, որ Սիրիայի զորքերն իրականացրել են «տարածքը ահաբեկիչներից մաքրելու» գործողություն:
Ավելի վաղ Սիրիայի իշխանությունները հերքել են Human Rights Watch իրավապաշտպան կազմակերպության հաղորդագրություններն այն մասին, որ Սիրիայի նախագահ Բաշար Ալ-Ասադի զորքերը կիրառել են կասետային ռումբ:
