Ազգային ժողովի ՀՀԿ խմբակցության ղեկավար Վահրամ Բաղդասարյանը հուլիսի 5-ին լրագրողների հետ հանդիպմանն անդրադառնալով սահմանադրական բարեփոխումներին՝ նշեց, թե Սերժ Սարգսյանը հստակ հայտարարել է իր դիրքորոշումները, պետք չէ դեպքերից առաջ ընկնել, պետք է սպասել սահմանադրական փոփոխությունների: Դիտարկմանը, թե Ռոբերտ Քոչարյանը և Սերժ Սարգսյանը բարեփոխվող սահմանադրության վերաբերյալ նույն կարծիքն ունեին, իսկ այժմ դրանք բոլորովին տարբեր են՝ պատասխանեց, թե ժամանակը թելադրում է իր պահանջները, բայց 2005 թվականին ևս կար խորհրդարանական համակարգի անցնելու տեսակետը: Նրա խոսքով՝ Ռոբերտ Քոչարյանը նախագահի աչքերով ունեցել է իր կարծիքը, հիմա ժամանակ է անցել և այլ կարծիքներ կան:
Տեսակետին, թե հաճախ են կարծիքներ հնչում, որ բարեփոխվող սահմանադրությամբ Սերժ Սարգսյանը փորձում է երկարաձգել իր պաշտոնավարման ժամկետը, նա արձագանքեց, թե չի կարծում՝ նախագահն իր պաշտոնավարման ժամկետը երկարաձգելու խնդիր ունի: «Կարծում եմ՝ նա նման ամբիցիաներ չունի, ցանկացած նախագահի համար կարևոր է իր երկրի առաջընթացը, թե որ մոդելով կարող է ավելի առաջընթաց ապահովել»,- ասաց նա:
Հարցին՝ հնարավոր է արդյոք Հայաստանը չմիանա ԵՏՄ-ին՝ հայտնվելով ընդդիմադիրների ասած «խորը և համապարփակ մանթոյի» մեջ, Բաղդասարյանը պատասխանեց, թե իրոք կային տեխնիկական հարցեր, սակայն դրանք հիմնովին լուծված են, պայմանագիրը պատրաստված է, ուղարկվել է ՄՄ անդամ երկրներին: Խմբակցության ղեկավարը հայտարարեց, թե որևէ նախապայմանով միությանն անդամակցելը բացառված է: «Հաջորդ հանդիպումը կլինի ինչպես Ղազախստանի ԱԳ նախարարն էր ասել՝ հոկտեմբերին, մոտավոր ձևով էր նա ասել: Մենք որևէ նախապայման չենք ընդունելու, հավասարը հավասարի պես պետք է անդամակցենք, բոլոր տեխնիկական խնդիրները լուծված են, այնպես որ ամեն ինչ ժամանակի հարց է»,- ասաց նա: Խոսելով Սերժ Սարգսյան – Վլադիմիր Պուտին չկայացած հանդիպումից՝ Բաղդասարյանը նշեց, որ այն մոտ ապագայում՝ այս ամռան ընթացքում, կկայանա:
Նախկին վարչապետ Տիգրան Սարգսյանի՝ ԱՄՆ-ում Հայաստանի դեսպան նշանակման դեմ ստորագրահավաքին Բաղդասարյանը լուրջ չի վերաբերվում: Էլեկտրաէներգիայի սակագնի բարձրացումն, ըստ նրա, հուզում է նաև իրենց՝ ՀՀԿ-ականներին:
«Չեմ կարծում՝ կլինի ՀՀ-ում մի քաղաքացի, ով ցանկություն ունենա, որ Հայաստանում էլեկտրաէներգիայի սակագները բարձրանան: Առաջին հերթին դա վերաբերում է հանձնաժողովին, ամենադեմը եղել է հանձնաժողովը, պատահական չէ, որ այդ նիստից առաջ քննարկում է եղել նաև Կառավարությունում, ելքերն էին փնտրում, և այլ տարբերակներ չկային, սակայն հանձնաժողովը մինչև վերջ ընդդիմացել է»,- ասաց նա:
Կառավարության կողմից հազարական դրամ փոխհատուցում ստացած աղքատ ընտանիքներն, ըստ բանախոսի, այն խավն են, որ ընդգրկված է նպաստառուների ցուցակի մեջ: Նրա խոսքով՝ հաշվարկված է, յուրաքանչյուր ընտանիքի վրա այս թանկացումը 730 դրամի ազդեցություն պետք է ունենա: Դիտարկմանը, թե՝ փոխհատուցում ստացողները պարտավոր են շնորհակա՞լ լինել ՀՀԿ-ին՝ իրենց 270 դրամ ավել գումար թողնելու համար, Բաղդասարյանը նշեց, որ շնորհակալության կարիք չկա, դրա ակնկալիքը ևս չկա: «Արվում է այն, ինչի հնարավորություն կա, հաշվարկները ցույց են տվել, որ կարելի է մեղմել այդ խնդիրը, որ այդ թանկացումն իրենց վրա ազդեցություն չունենա»,- ասաց նա:
Լուսանկարը՝ Photolure-ի
