Սիրիայում իշխանության և ընդդիմության միջև բախումը չափազանց բարդ իրողություն է: Հայաստանը կանգնած է սփյուռքի կարևոր կենտրոն կորցնելու վտանգի առջև, բայց սիրիահայերի խնդիրները լուծելու ՀՀ ձեռնարկած քայլերն ու միջոցառումները քիչ են: «Առաջին լրատվական»-ի հետ զրույցում այս մասին ասաց Ստամբուլում հրատարակվող «Ակօս» շաբաթաթերթի հայկական բաժնի խմբագիր Բագրատ Էստուկյանը՝ անդրադառնալով օրեր առաջ անցկացված «Հայաստան» համահայկական հիմանդրամի 15-րդ հեռուստամարաթոնին, որի ժամանակ հավաքագրված գումարից մաս է հատկացվելու նաև սիրիահայերի աջակցությանը:
Բագրատ Էստուկյանը տեղեկացրեց, որ Թուրքիայում ևս զանազան նախաձեռնություններ, դրամահավաքներ են կազմակերպվում՝ հաջակցություն սիրիահայերի: «Ստամբուլում Հայաստան եկող սիրիահայերի համար ձմեռային հագուստ է հավաքագրվում, աշխատանքներ են իրականացվում: Սփյուռքի կարևորագույն համայնքի համար ծանր ճգնաժամային վիճակ է, միշտ կապի մեջ ենք, անընդհատ տեղեկություններ են գալիս այն մասին, որ համայնքը քայքայվում է»,- ասաց Էստուկյանը շարունակելով, որ մինչև այսօր ՀՀ-ում կազմակերպված համագումարները, դրամահավաքները գործնական արդյունք չեն ունենում, այլ զբոսաշրջային միջոցառումներ են, որոնք առավել լավ կազմակերպման դեպքում կարող էին ճգնաժամին դիմակայելու լավ տարբերակ դառնալ: Ըստ նրա՝ նույնիսկ սիրիահայերի աջակցության միտքն այս տարի շեշտակիորեն չի բարձացրել հետաքրքրությունը դրամահավաքի հանդեպ, քանի որ դա գործնական բնույթ չի կրում, նաև Հայաստանում լավ չեն պատկերացնում, թե սիրիահայերն ինչ խնդիրների առջև են կանգնած:
«Հայաստանը պետք է Հալեպում ակտիվ ներկայություն ունենար ամենատարբեր մակարդակներով: Սփյուռքի նախարարն անձամբ պետք է Հալեպ գնար, աշխատանքային մեկ շաբաթ անցկացներ, հասկանար, թե ինչ էր պետք և ինչ պետք չէր: ԱԳՆ հրամանով բարձրաստիճան պաշտոնյաներ և տեղակալները պետք է լինեին Հալեպում, նույնը՝ ավանդական կուսակցությունները, ներկա իշխող կուսակցությունները»,- կարծիք հայտնեց Բագրատ Էստուկյանը:
Հիշեցնենք, որ օրեր առաջ անցկացված ամենամյա «Հայաստան» համահայկական հիմնադրամի «Հեռուստամարաթոն 2012»-ի արդյունքում ստացվել էր 21 միլիոն 422 հազար 477 դոլարի նվիրատվություն և նվիրատվության խոստում։ Հանգանակված գումարը պետք է հատկացվի Ղարաբաղի գյուղերում համայնքային կենտրոնների կառուցմանն ու սիրիահայության խնդիրների լուծմանը: Սակայն ստացված գումարը նախորդ տարի հանգանակված գումարից քիչ է ավելի, որից պետք է բաժին ստանան նաև սիրիահայերը:
