Ֆրեդի Մերկուրին (իսկական անունը` Ֆարուխ Բուլսարա) ծնվել է 1946-ի սեպտեմբերի 5-ին` Զանզիբարում: Ծնողները նրան դաստիարակել են պարսկական մշակույթի ոգով: 1954 թ. ծնողները նրան տարել են Սուրբ Պետրոսի անվան դպրոց:
Ուսման առաջին տարիներին Ֆարուխի դասընկերները նրան անվանել են Ֆրեդի: Ֆրեդին լավ է սովորել` մեծ հետաքրքրություն դրսևորելով երաժշտության և արվեստի նկատմամբ, նա հիանալի նկարել է, երգել դպրոցական երգչախմբում, մասնակցել դպրոցական բեմադրություններին:
Տղայի ունակությունները նկատել է դպրոցի տնօրենը, որը նրան առանձին վճարի դիմաց առաջարկել է դաշնամուր նվագելու դասեր կազամակերպել: Ծնողները համաձայնել են: Ֆրեդին իր եզակի տաղանդը զարգացնելու հնարավորություն է ստացել: 12 տարեկանում նա դարձել է իր իսկ ստեղծած երաժշտական խմբի անդամ, որը ելույթներ է ունեցել դպրոցական երեկույթների, տարբեր միջոցառումների ժամանակ: Ֆրեդին եղել է իր խմբի դաշնակահարը:
Շուտով նրանց ընտանիքը տեղափոխվել է Անգլիա, որտեղ նա 1969-ին պոլիտեխնիկական քոլեջը ավարտել է գերազանցությամբ: Նա որոշել է լրջորեն զբաղվել երաժշտությամբ: Ֆրեդիի անգլիական առաջին խմբերից է եղել IBEX-ը, որը 1969-ի վերջին լուծարվել է: 1970-ին նրա ընկեր Սթաֆֆելը լքել է SMILE խումբը, Ֆրեդին որոշել է ինքը զբաղեցնել նրա տեղը:
Նա փոխել է խմբի անունը` QUEEN, իսկ իր ազգանունը` Մերկուրի: Այսպես սկսվել է լեգենդար «Թագուհու» կարիերան: 1986-ին լուրեր են տարածվել, որ Ֆրեդի Մերկուրին հիվանդ է ՁԻԱՀ-ով, սակայն մինչև իր կյանքի վերջին օրերը երաժիշտը հերքել է դա: 1991-ի նոյեմբերի 23-ին Ֆրեդի Մերկուրին պաշտոնապես հայտարարել է, որ հվանդ է ՁԻԱՀ-ով: Նա մահացել է նոյեմբերի 24-ին` Լոնդոնի իր տանը:
