Իտալիայի նախկին վարչապետ Սիլվիո Բեռլուսկոնին, որը Գերագույն դատարանի կողմից 4 տարվա ազատազրկման է դատապարտվել ֆինանսական խարդախությունների աղմկալի գործով, ստիպված է եղել պաշտոնապես ներողություն խնդրել դատական մարմիններից վերջերս նրանց հասցեին արած հայտարարությունների համար: Այս մասին հայտնում է RIA Novosti-ն:
Պարզաբանումների համար նա երեկ կանչվել էր Արդարադատության պալատ: Հունիսի 19-ին նա Նեապոլում հանդես էր եկել որպես վկա՝ Պանամայում հայտնի գործարար Վալտեր Լավիտոլայի մասնակցությամբ խարդախությունների գործով: Բեռլուսկոնին մասնավորապես ասել էր, որ Իտալիայի դատաքննչական մարմինները գործում են անվերահսկելի, անպատասխանտու և ունեն լիարժեք անձեռնմխելիություն:
Բեռլուսկոնին ներողություն է խնդրել և իր արտահայտությունները համարել պարզապես «կատակով դիտողություն»: Տեղի ԶԼՄ-ները տեղի ունեցածը դիտարկում են որպես «դեղին քարտ» վարչապետին: Նման արտահայտությունների կրկնման դեպքում Միլանի վերահսկիչ դատարանը կարող է չեղյալ հայտարարել իր որոշումը՝ Բեռլուսկոնիի ազատազրկման պատիժը հասարակական աշխատանքներով փոխարինելու վերաբերյալ:
