Եվրախորհուրդը դեռևս որոշում չի ընդունել Ռուսաստանի դեմ պատժամիջոցների ուժեղացման մասին, սակայն սպառնում է նոր սահմանափակող միջոցառումներ ընդունել, եթե Ուկրաինայի լիցքաթափմանն ուղղված միջոցառումները, որոնց մասին հայտարարվել էր ուրբաթ, չկատարվեն՝ հայտարարել է Եվրախորհրդի նախագահ Հերման վան Ռոմպեյը: Այս մասին փոխանցում է RIA Novosti-ն:
«Ուրբաթ նախագահ Պյոտր Պորոշենկոյի հետ բանակցություններից հետո Եվրախորհուրդը հայտնել էր մի շարք հրատապ և հստակ քայլերի մասին, որոնցից կախված կլինեն մեր հաջորդական որոշումները: Խորհուրդն ուսումնասիրում է իրավիճակը, և եթե պետք լինի, կընդունի անհրաժեշտ որոշումներ: Եվրախորհրդի առաջնորդները հակված են հանդիպելու ցանկացած ժամանակ՝ ընդունելու հետագա նշանակալի սահմանափակող միջոցառումներ»,-ասել է Ռոմպեյը՝ ելույթ ունենալով Եվրախորհրդարանի պատգամավորների առջև:
ԵՄ գագաթնաժողովը հունիսի 27-ին՝ Ուկրաինայի հետ Ասոցացման համաձայնագրի ստորագրումից հետո, ձևակերպել էր Ռուսաստանի հանդեպ 4 պահանջ:
ԵՄ-ն առաջին հերթին պահանջել է ստեղծել հրադադարի ռեժիմի պահպանման մոնիտորինգի և ԵԱՀԿ առաքելության հսկողության ներքո սահմանի արդյունավետ վերահսկման մեխանիզմ, կառավարական զորքերին վերադարձնել սահմանային անցակետերը, ազատել բոլոր պատանդներին, գործարկել համապարփակ բանակցություններ՝ Պորոշենկոյի խաղաղ ծրագիրը կյանքի կոչելու համար: