ՆԱՏՕ-ի ներկայացուցիչները քննարկում են Թուրքիայի՝ իր տարածքում Patriot հրթիռային համակարգ տեղակայելու խնդրանքը: Թուրքիան այդ կերպ մտադիր է պաշտպանել Սիրիայի հետ իր սահմանը: Ռուսաստանը դեմ է հանդես գալիս դրան: Մոսկվան ահազանգ է համարում թուրքական նախաձեռնությունը, որը, ՌԴ ԱԳՆ պաշտոնական ներկայացուցիչ Ալեքսանդր Լուկաշևիչի խոսքով՝ «չի նպաստի տարածաշրջանի կայունությանը»:
«Դա ահազանգ է, և մեր խորհուրդը թուրք գործընկերներին այն է, որ Թուրքիան օգտագործի իր ազդեցության ներուժը սիրիական ընդդիմության վրա, որպեսզի գործը շուտափույթ բերի միջսիրիական երկխոսության սկսման, այլ ոչ թե զբաղվի մկանների ամրացմամբ և իրավիճակը տեղափոխի վտանգավոր ուղղությամբ »,- Լուկաշևիչի խոսքերն է մեջբերում RIA Novosti-ն:
ՆԱՏՕ-ի երկրների դեսպանները հանդիպել են չորեքշաբթի՝ քննարկելու թուրքական կողմի խնդրանքը, որին նախորդել են Թուրքիայի և ՆԱՏՕ-ի նրա դաշնակիցների բանակացությունները թուրք-սիրիական 900 կմ սահմանի անվտանգության ապահովման ջանքերի մասին՝ խուսափելու համար այնտեղ ընթացող քաղաքացիական պատերազմի կողմնակի հետևանքներից:
Ֆրանսիայի արտգործնախարար Լորան Ֆաբիուսը Փարիզում հինգշաբթի հայտարարել է, որ իր երկիրն աջակցում է Թուրքիայի խնդրանքին, քանի որ այն պաշտպանական բնույթ է կրում:
Patriot հրթիռներն արդեն երկու անգամ տեղակայվել են Թուրքիայում իրաքյան պատերազմի ժամանակ՝ 1991 և 2003 թվականներին, սակայն ոչ մի անգամ չեն կիրառվել:
ՆԱՏՕ-ի անդամ երկրներից ներկայումս իրենց զինանոցներում Patriot համակարգեր ունեն միայն ԱՄՆ-ն, Գերմանիան և Նիդերլանդները: Հաջորդ շաբաթ ՆԱՏՕ-ի փորձագիտական խումբը պատրաստվում է այցելել Թուրքիա, որպեսզի տեղում որոշի հրթիռիների տեղակայման հնարավորությունը,- հաղորդում է Radio Free Europe-ը։
