Իշխանությունը վերարտադրվելու բոլոր նախադրյալները ստեղծել է։ Նման կարծիք այսօր «Տեսակետ» ակումբում հրավիրված մամլո ասուլսի ընթացքում հայտնեց «Նոր ժամանակներ» կուսակցության նախագահ Արամ Կարապետյանը.
«Շատ հետաքրքրիր վիճակ է Հայաստանում: Այն ճահճին, որի մեջ մենք ապրում էինք, գումարվել է քաոսը: Գալիք նախագահական ընտրություններին խորհրդարանական կեղծումները շարունակվելու են: Ես նույնիսկ լսել եմ , որ խորհրդարանական ընտրություններին հավաքված անձնագրերը չեն վերադարձվել, որպեսզի նույն կեղծիքները շարունակեն իրականացնել նաև այս անգամ:
Աշխարհը մեր իշխանության համար անհասականալի պահանջ է դնում: Սերժ Սարգսյանին առաջարկում են ի հայտ բերել մրցունակ թեկնածու, որպեսզի Հայաստանում ժողովրդավարական ընտրությունների ֆոն ստեղծվի: Վերջին մեկ ամսվա ընթացքում Սերժ Սարգսյանին համոզել են, որ մրցունակ ընտրություններ պետք են, և նա էլ կարծես համոզվել է:
Իշխանությունը մարդ է ման գալիս երկրորդ դնելու, որպեսզի լուրջ ընտրություններ ստեղծի և հաղթի: Ընդդիմությունը հասկանում է՝ լավ, դրեցինք ինչ-որ մեկին, այդ մեկը պարտվեց: Առաջին հերթին խոսակցություն կգնա, որ պայմանավորված էին իշխանության հետ: Մի քիչ դժվար է պատկերացնել հեղափոխական «Բարգավաճ Հայաստան» Ազատության հրապարակում՝ «ՍերԺ Սարգսյան հեռացիր» կոչերով: Այնպես որ, կարծում եմ՝ եթե այսպես շարունակվի, Սերժ Սարգսյանը կարող է հաղթել էպոսագետ Վարդան Սեդրակյանին»:
