Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին նախագահական նստավայրում երիտասարդության հետ հանդիպման ժամանակ իր մտահոգությունն է հայտնել Վրաստանում «Միասնական ազգային շարժում» կուսակցության համակիրների և գործադիր իշխանության նախկին անդամների զանգվածային ձերբակալությունների կապակցությամբ.
«Մեր անկախության պատմության ընթացքում առաջին անգամ տեղի ունեցավ թավշյա իշխանափոխություն: Մենք շատ անհեթեթություններ ենք լսել, ոմանք ասում են, թե Սաակաշվիլին կառավարության փոփոխման մասին հայտարարել է այն պատճառով, որ նրան զանգահարել են ամերիկացիները: Ցանկանում եմ ասել, որ ամերիկացիները մեզանից շատ են զարմացել խորհրդարանական ընտրությունների արդյունքներից:
Ես այդպիսի որոշում եմ ընդունել, քանի որ ցանկացել եմ կառուցել ժողովրդավարական համակարգ, ուր կընտրեին նոր մեծամասնություն: Ես ցանկանում եմ, որ Վրաստանը լինի այնպիսի երկիր, ուր միմյանց չեն սպանում ու ձերբակալում նրա համար, որ իշխանություն է փոխվել: Նոր կառավարությանը կոչ եմ անում ռևանշիստական գործողություններից անցում կատարել նախընտրական խոստումների իրագործմանը:
Վերջին օրերին նոր կառավարության ներկայացուցիչների արած հայտարարություններից կարելի է եզրակացնել, որ ձերբակալությունները շարունակվելու են և վերաբերվելու են «Վրացական երազանքի» քաղաքական բազմաթիվ ընդդիմախոսների: Երկրում ձերբակալությունների ալիք է, որը ոմանց մոտ առաջացնում է ուրախություն, իսկ ոմանց մոտ էլ, ինչպես նաև մեր եվրոպացի գործընկերների մոտ՝ մտահոգություն»:
