Նոյեմբերի 20-22-ը Հայաստան ժամանած Չեխիայի Հանրապետության ԱԳ փոխնախարար Տոմաշ Դուբի այցի շրջանակներում նոյեմբերի 20-ին «Գոլդեն Թուլիփ» հյուրանոցում կայացել է հայ-չեխական գործարար համաժողով, որին մասնակցեցին շուրջ չորս տասնյակ հայ և չեխ գործարարներ: ՀՀ ԱԳՆ մամլո գրասենյակից «Առաջին լրատվական»-ին հայտնում են, որ չեխական կողմից ներկայացված են եղել նաև բանկային, ապահովագրական և մասնավոր սեկտորի հեղինակավոր ընկերությունների ներկայացուցիչներ:
Համաժողովին բացման խոսքով հանդես են եկել ՀՀ և Չեխիայի Հանրապետության ԱԳ փոխնախարարները` Զոհրաբ Մնացականյանը և Տոմաշ Դուբը, Հայկական Զարգացման Գործակալության տնօրեն Ռոբերտ Հարությունյանը և ՀՀ-ում Չեխիայի Հանրապետության գործերի ժամանակավոր հավատարմատար Պետր Միկիսկան:
Այնուհետև ներկայացվել է Հայաստանում ներդրումային և գործարար մթնոլորտի վերաբերյալ զեկույց: Լիագումար նիստի ավարտին համաժողովը շարունակել է աշխատանքներն` արդեն աշխատանքային խմբերի ձևաչափով:
Նոյեմբերին 21-ին կկայանան ՉՀ փոխնախարար Տոմաշ Դուբի պաշտոնական հանդիպումները ՀՀ ԱԺ արտաքին հարաբերությունների հանձնաժողովի նախագահի, Երևանի քաղաքապետի, ՀՀ տրանսպորտի նախարարի, ինչպես նաև արտաքին գործերի ու էկոնոմիկայի փոխնախարարների հետ:
