Facebook սոցիալական ցանցում օգտատերերից մեկի գրառումը` բարերար Միքայել Վարդանյանի` կանխիկ կերպով գումար բաժանելու մասին, մեծ արձագանք է ստացել: Մի քանի ժամ առաջ ֆեյսբուքյան օգտատեր, դատական դեպարտամենտի լրատվության հետ կապերի վարչության պետ Արսեն Բաբայանն իր ֆեյսբուքյան էջում գրել էր.
«Բարերար Միքայել Վարդանյանը («Մասիս տոբակ») շրջում է գյուղերով ու տեղում լուծում գյուղերի մի շարք ֆինանսական խնդիրներ։ Շատ լավ է, կեցցե բարերարը։ Բայց։) Ինչի՞ քեշով։ Բարերարը «Շանթ»-ի եթերում ծրարներով քեշ փող է տալիս գյուղերի ղեկավարներին։ Սենց բան չէի տեսել։) Բանկերը երևի չսիրեն այս բարերարին»։
«Առաջին լրատվական»-ը փորձեց պարզել՝ իրականում Միքայել Վարդանյանը գյուղապետերին բաժանե՞լ է կանխիկ գումար, թե՞ ոչ:
«Առաջին լրատվական»-ի հետ զրույցում «Գրանդ Տոբակո»-ի հասարակայնության հետ կապերի բաժնի պետ Վահրամ Բրուտյանը նույնիսկ չցանկացավ անդրադառնալ այդ գրառմանը: Միայն ասաց` եթե որևէ տեղ որևէ բարեգործություն արվում է, ապա միայն օրինական կարգով: «Անօրինական կարգով ոչինչ չի արվում: Իսկ ընդհանրապես` ես չեմ մեկնաբանում այդ գրառումը»,- եզրափակեց Վահրամ Բրուտյանը:
