Նախորդ տարիներին տարբեր կառույցների կողմից թեժ պայքար էր իրականացվում դեղորայքի շուկայում, բացահայտվեցին զգալի քանակությամբ կեղծ ու ժամկետանց դեղեր: Դրանից հետո խաղաղություն է: Դեղերի կեղծումը նաև մրցակցության լուրջ խոչընդոտներ է առաջացնում: Սակայն Տնտեսական մրցակցության պաշտպանության պետական հանձնաժողովը դեղերի շուկայում, բացի գնումների մասով, այլ ստուգումներ չի նախատեսում իրականացնել:
«Դեղերի կեղծ լինելու հետ կապված՝ կոնկրետ գործողություններ չենք նախատեսում, բայց սա նաև քրեորեն պատժելի արարք է հանդիսանում, քրեական օրենքների խախտում է, և սա, բնականաբար, անդրադառնում է անբարեխիղճ մրցակցության վրա: Քանի որ դեղերի հետ կապված՝ մի քիչ ավելի սպեցիֆիկ երևույթ է, եթե պատկան մարմինները բացահայտեն, արձանագրեն այդ փաստերը, մենք՝ որպես մեր դաշտում անբարեխիղճ մրցակության, կենթարկենք պատասխանատվության»,- «Առաջին լրատվական»-ի հետ զրույցում ասաց ՏՄՊՊՀ նախագահ Արտակ Շաբոյանը:
Նա հավելեց, որ ՏՄՊՊՀ-ն, կոնկերտ դեղերի հետ կապված, մինչ այժմ բողոքներ չի ստացել:
