ՀՀ արդարադատության նախկին նախարար, ԱԺ պատգամավոր Դավիթ Հարությունյանն այսօր «հույժ կարևորեց» ԱԺ-ում կազմակերպված Քրեակատարողական հիմնարկներում և ոստիկանության` ձերբակալված անձանց պահելու վայրերում մարդու իրավունքների վիճակի վերաբերյալ խորհրդարանական լսումները, քանի որ այս համակարգում իրավիճակը կարող է փոխվել հենց այսպիսի միջոցառումների շնորհիվ:
Հարությունյանը փաստեց, որ թե՛ 2002 թ.-ից հետո, թե՛ այժմ այդ համակարգում շատ խնդիրներ կան` թե՛ կոռուպցիայի հետ կապված, թե՛ այլ, և դրանք արագ լուծվող չեն:
Դ. Հարությունյանը մտահոգություն հայտնեց անարդարացի պատիժների առնչությամբ ելույթներում հնչած կարծիքների վերաբերյալ: «Այս համակարգը տեղափոխվել է ԱՆ ենթակայության տակ, քանի որ այն քննչական գործառույթ չի իրականացնում»,- նշեց պատգամավորը՝ հավելելով, որ վիթխարի գումարներ են պահանջվում այս համակարգը կարգի բերելու համար, բայց բազմաթիվ բաներ կարելի է անել և առանց ֆինանսների, օրինակ՝ պատուհան լվանալ, օդափոխել և այլն:
«Իսկապես, այդ համակարգում հակվածությունը խեղումներին բավականին մեծ է և պահանջում է մեծ աշխատանք: Այստեղ լուծումները ինստիտուցիոնալ են, և այդ ուղղությամբ աշխատանք տարվում է: Երբ ՔԿՀ-ում է հայտնվում մարդը, աշխատանք է տարվում նրա հետ՝ պարզելու նրա հակվածությունները, պոտենցիալ վտանգները, դրանից հետո պետք է կատարվի համապատասխան կոռեկցիոն աշխատանք: Պետք է մտածել այս ինստիտուտի կարողությունների բարձրացման մասին»,- նշեց Դ. Հարությունյանը:
«Սոցիալական ռեաբիլիտացիայի հարցը ՔԿՀ-ներում զրոյական է»,- հայտարարեց ԲՀԿ պատգամավոր Նաիրա Զոհրաբյանը՝ հայտնելով, որ ՔԿՀ-ներ իրենց այցելությունների ժամանակ ոչ մի տեղ չեն հանդիպել դրան, և դա շատ լուրջ խնդիր է:
Հարությունյանն առաջարկեց հետագա աշխատանքները շարունակել այդ ուղղությամբ:
