«Լոս Անջելես Գելաքսի»-ի կիսապաշտպան Դեյվիդ Բեքհեմը որոշում է կայացրել լքել ակումբը:
Թիմի կազմում նրա վերջին խաղը կդառնա MLS-ի եզրափակիչը «Հյուսթոն Դինամո»-ի դեմ, որը կկայանա դեկտեմբերի 1-ին:
«Այն ժամանակը, որ անցկացրել եմ «ԼԱ Գելաքսի»-ում, անհավանական էր, բայց ես ցանկանում եմ ևս մեկ փորձառություն ստանալ նախքան կարիերաս ավարտելը: Ես սա չեմ համարում MLS-ում իմ կարիերայի ավարտ, քանի որ չեմ բացառում, որ ապագայում նորից կլինեմ այստեղ», – Բեքհեմի խոսքերն է մեջբերում ակումբի պաշտոնական կայքը:
Բեքհեմը «ԼԱ Գելաքսի»-ի կազմում է հանդես գալիս 2007 թվականից, ու թիմի հետ մեկտեղ 2011 թվականին դարձել է MLS հաղթող: Բացի այդ, նա երեք անգամ մասնակցել է MLS-ի աստղերի հանդիպմանը:
