ԵԱՀԿ երևանյան գրասենյակի, Երևանում Եվրոպայի խորհրդի գրասենյակի, «Քաունթերփարթ ինտերնեշնլ»-ի, Հայաստանում Եվրամիության պատվիրակության, Բրիտանական դեսպանատան, ՄԱԿ-ի և ԱՄՆ դեսպանատան նախաձեռնությամբ, հերթական անգամ կայացավ համընդհանուր իրավունքներին նվիրված մրցանակների հանձնման արարողությունը:
Ինչպես տեղեկացրին Հայաստանում միջազգային կառույցների ներկայացուցիչները, մրցանակաբաշխության նպատակն է խթանել մարդու իրավունքների պաշտպանությունը, հաշվետու կառավարումը, քաղաքացիական ակտիվությունը, տեղական իշխանության բարեփոխումները, համայնքային ծառայություններն ու Հայաստանում խոսքի ազատությունը:
Երևանում Եվրոպայի խորհրդի գրասենյակի ղեկավար Օլեքսանդր Պավլյուկը «Ազատության պաշտպան» մրցանակը հանձնեց իրավաբաններ, իրավապաշտպաններ Արտակ Զեյնալյանին և Արա Ղազարյանին՝ բարձր գնահատելով նրանց մասնագիտական բարձր պատրաստվածությունն ու մարդու իրավունքների պաշտպանության ոլորտում գրանցած հաջողությունները:
«Մենք չենք վճարելու 150 դրամ» քարոզարշավի կազմակերպիչներ Կարեն Հարությունյանը և Ռուզաննա Գրիգորյանը ևս ստացան «Քաղաքացիական ակտիվություն» մրցանակ հանրային որոշումների կայացման մեջ թափանցիկության և հաշվետվողականության հետապնդման նշանավոր ջանքերի համար Հայաստանում «Քաունթերփարթ ինթերնեյշնլ» կազմակերպության ղեկավար Քարել Հոֆսթրայի կողմից: Քարել Յոֆսթրան նախ պատմեց երիտասարդների գրանցած քաղաքացիական հաղթանակի և դրա ձեռքբերման մասին: Նա նշեց. «Նման օրինակները Հայաստանում քաղաքացիական ակտիվության մասին լավ կանխատեսումներ անելու առիթ են տալիս»:
«Խիզախ կին» մրցանակը հանձնեց Հայաստանում Մեծ Բրիտանիայի արտակարգ և լիազոր դեսպան Քեթրին Լիչը Կանանց ռեսուրսային կենտրոնի ղեկավար Լարա Ահարոնյանին: Լարա Ահարոնյանին նա շնորհակալություն հայտնեց ցուցաբերած քաջության և ոլորտում գրանցած հաջողությունների համար:
Հայաստանում ԵՄ պատվիրակության ներկայացուցիչ Դըրկ Լորենցը «Մեդիա գերազանցություն» մրցանակը հանձնեց Հետաքննող լրագրողների «Հետք» ասոցիացիայի ղեկավար Էդիկ Բաղդասարյանին՝ գնահատելով «Հետք»-ի մատուցած լրագրության որակն ու անաչառությունը:
ԵԱՀԿ երևանյան գրասենյակի պետի տեղակալ Ուիլիամ Հենլոնը «Կառավարության բարեփոխիչ» մրցանակը հանձնեց ՀՀ պաշտպանության փոխնախարար Դավիթ Տոնոյանին:
ՄԱԿ-ի երևանյան գրասենյակի ներկայացուցիչ Բրեդլի Բուզետոն «Տեղական կառավարման բարեփոխիչ» մրցանակը հանձնեց Քարահունջ համայնքի ղեկավար Լուսինե Ավետյանին:
Եվ վերջում ՀՀ-ում ԱՄՆ դեսպան Ջոն Հեֆերնը «Համայնքային ծառայության» մրցանակը հանձնեց Երևանում Մանկական վերականգնողական կենտրոնի ղեկավար, բժշկուհի Լաուրա Մովսիսյանին:
Առաջարկում ենք մանրամասներին ծանոթանալ տեսանյութի միջոցով:
