Մարսի մակերևույթի վրա ռադիոակտիվ ճառագայթման մակարդակը, որը գիտնականները համարում էին Կարմիր մոլորակի վրա մարդու տեղակայման խոչընդոտներից մեկը, իրականում համեմատելի է Երկրի ուղեծրի ցածր գոտիներում ճառագայթման մակարդակի հետ: Այս մասին են վկայում Curiosity մարսագնացի չափումների տվյալները:
«Աստղագնացները կարող են ապրել նման պայմաններում»,- ասել է Կոլորադոյի Հարավարևմտյան հետազոտական ինստիտուտի մասնագետ Դոն Հասլերը՝ մեկնաբանելով պատմության մեջ Կարմիր մոլորակի մակերևույթի ռադիոակտիվ ճառագայթման մակարդակի առաջին չափումների արդյունքները:
Fox News-ի փոխանցմամբ՝ Հասլերը Curiosity -ի ռադիոակտիվ ֆոնի դետեկտորի արձանագրած տվյալների առաջատար հետազոտողն է:
Արևային ռադիոճառագայթումից Երկրի բնակիչներին պաշտպանում է հզոր մագնիսական դաշտը, որը Մարսը չունի: Հենց դա էլ տեղիք է տալիս գիտնականներին կասկածելու այնտեղ կյանքի հետագա հնարավորության մասին: Սակայն վերջին հետազոտությունները ցույց են տվել, որ Մարսի մթնոլորտը թեև կազմում է Երկրի մթնոլորտի խտության 1 տոկոսը, այն, համենայնդեպս, խոչընդոտ է հանդիսանում տիեզերքից արագաշարժ վտանգավոր մասնիկների համար:
Հասլերն ընդգծել է, որ ստացված արդյունքները նախնական են:
