Հիմնական պայքարը ԲՀԿ-ի համար է. նման կարծիք այսօր «Ելակետ» ակումբում հրավիրված ասուլիսի ընթացքում հայտնեց քաղաքագետ Արմեն Աղայանը։
«Ներքաղաքական զարգացումներն այսօր ավելի շատ հետաքրքրում են լրագրողներին, քան ժողովրդին: Բոլոր այդ քայլերը՝ ԲՀԿ- ՀՅԴ, ԲՀԿ-ՀԱԿ կոնսուլտացիաները, ժողովրդական քվեներ ձեռք բերելու միտում չունեն: Սա դեռ նախընտրական քարոզարշավ չէ, ուղղակի առևտուր անելու դրսևորումներ են: Դեռ պարզ չէ՝ կմասնակցե՞ն այդ կուսակցություններն ընտրություններին, թե՞ ոչ:
Բանակցային գործընթացի հիմնական առևտուրը գնում է «Բարգավաճ Հայաստան»-ի համար: Մի կողմից՝ իշխանությունն ուզում է, որ ԲՀԿ-ն հայտարարի, թե սատարելու է Սերժ Սարգսյանի թեկնածությունը, մյուս կողմից՝ Քոչարյանն ուզում է, որ ԲՀԿ-ն գործի իր խաղի կանոններով: Երրորդը ասպարեզից հեռացող Կոնգրեսն է, որն ուզում է իր գոյությանն իմաստ հաղորդել ԲՀԿ-ի միջոցով, բայց միայն այն դեպքում, եթե «Բարգավաճը» գործի Քոչարյանից անկախ:
Այս պահին ամենաքիչ հավանականն այն է, որ «Ժառանգությունը» միանա ինչ-որ ընդդիմադիր կառույցի: Նա ուզում է ցույց տալ, որ ինքն է միակ և իսկական ընդդիմությունը»:
Անդրադառնալով ՀՅԴ-ի ամբողջովին համամասնական ընտրակարգին անցնելու առաջարկին՝ Աղայանը նշեց, թե բոլորը հասկանում են, որ այդ առաջարկներն այսօր չեն իրականանլու։
«Որպես համակարգային փոփոխություն՝ դա չնչին բան է: Ըստ էության, Հայաստանը երկու անգամ խորհրդարանական երկիր եղել է: Մեկը Վազգեն Սարգսյանի իշխանության օրոք էր, երբ Քոչարյանի նախագահությունը ձևական բնույթ ուներ, մյուսն էլ՝ երբ Վազգեն Մանուկյանը վարչապետ էր, և մենք նախագահ չունեինք:
Ամբողջովին համամասնականի դեպքում մենք կունենանք իշխանության մեջ միակ բևեռի հանգամանքը, այսինքն՝ կունենանք բևեռված մեկ անձի առկայությունը: Բայց չի կարելի ասել, որ ընդհանրապես ոչին չի փոխվի: Եթե, օրինակ, դաշնակցությունը հիմա ստանա վեց մանդատ, համամասնականի դեպքում կստանա ինը մանդատ: Սա վերաբերում է այն կուսակցություններին, որոնք իրական քվեների վրա են հենված: Իսկ Հանրապետականի և «Բարգավաճ»-ի դեպքում մանդատների թիվն էապես կպակասի: Սա գուցե և հանգեցնի իշխանափոխության»,- եզրափակեց քաղաքագետը:
