Արդարադատության փոխնախարար Գրիգոր Մուրադյանը կարծում է, որ «Դատական օրենսգրքում փոփոխություններ և լրացումներ կատարելու մասին» օրենքի նախագիծը կարևորագույն փուլ է դատաիրավական բարեփոխումների ռազմավարական ծրագրով նախատեսված միջոցառումների ուղղությամբ:
«Որոշակիորեն ամբողջականացվում է այն փաթեթը, որ ուղղված է դատավորների ներքին անկախության էական ամրապնդմանը: Համամիտ չեմ, որ հնարավոր չէ այս մոտեցումներով այդ հիմնախնդիրներին լուծում տալ, որովհետև հաճախ առաջանում է շփոթ` ինչին կարելի է լուծում տալ օրենսդրական մակարդակում, և ինչին` օրենքների կիրառման ընթացքում:
Սրանք լրիվ տարբեր մակարդակներ են, անհրաժեշտ է տարանջատել»,- ասաց նա:
Մուրադյանը կարևորեց նախագիծն` այն առումով, որ դատավորները կախված չլինեն դատարանների նախագահներից, որ վճռաբեկ վարույթի կանոնները հստակեցվեն և այլն: Փոխնախարարը չհամաձայնեց պնդումների հետ, որ ԱԺ մեկ կարևոր մասը` հանձնաժողովը, կարող է Կառավարությանը որևէ բան պարտադրել: «Խնդրում եմ պատրանքներ չստեղծել, որ որևէ պարտադրանք ընդունելի է ինքնուրույն իշխանության լիովին այլ թևը ներկայացնող մարմնի համար»,- ասաց նա:
