ԱԺ անկախ պատգամավոր Էդմոն Մարուքյանը հունիսի 12-ին ԱԺ նիստում ներկայացրեց «Դատական օրենսգրքում փոփոխություններ ու լրացումներ կատարելու մասին» օրենքի նախագիծը: Մարուքյանի խոսքով` նախագիծը քննարկվել է արդեն իրենց հանձնաժողովում, հիմնական սկզբունքային հարցը դատավորների լիազորությունների դադարեցման կարգին էր վերաբերում, որ գնահատման չափանիշների կիրառման արդյունքում դատավորի լիազորությունները կարող էին դադարեցվել: «Այդ հնարավորությունը, որ նոր լծակ կարող էր հանդիսանալ դատական իշխանության համար չունեցած անկախությունն ավելի նվազեցնելու, մեր պնդմամբ հանվել է»,- ասաց նա` հավելելով, որ հիմա այդ կետը չկա, որի համար էլ ինքն է զեկուցում:
ԲՀԿ-ական պատգամավոր Էլինար Վարդանյանը հետաքրքրվեց` արդյոք այս գնահատումը` յուրաքանչյուր երեք տարին մեկ, լրացուցիչ կոռուպցիոն ռիսկերի հնարավորություն չի ստեղծելու, որ դատավորները երեք տարին մեկ փորձեն պահպանել իրենց աշխատանքը:
Մարուքյանը պատասխանեց, որ դատավորների ինքնակառավարման մարմնում ստեղծվում են ընթացակարգեր, որ այդ ինքնակառավարման մարմինն ինքն իր խնդիրները լուծի և այդ խնդիրները լուծելով շարժվի առաջ` շատ ավելի լավ դատական համակարգ ունենալու համար: «Աշխատանքը կորցնելու հետ կապված մտավախություն չկա: Առավելագույնը, որ կարող է արվել, որպես` այսպես կոչված ճնշում, դատավորը պետք է գնա վերապատրաստման: Առավելագույնը որ կարող է արվել, վերապատրաստումն է, որի մեջ ես որևէ վատ բան չեմ տեսնում»,- ասաց նա: