Ոստիկանության անձնագրային և վիզաների վարչությունում փոփոխություններ են կատարվել: Վարչության նախկին պետ Նորայր Մուրադխանյանն ուղարկվել է կադրերի ռեզերվ, նրա փոխարեն նշանակվել է ՀՀ ոստիկանության շտաբի պետի տեղակալ, շտաբի ինսպեկիցայի պետ Միշա Սարդարյանը: Կատարված փոփոխությունները եղել են վարչությունում սկսված ստուգումների արդյունքում: Նշենք, որ վարչությունում աղաղակող խախտումներ էին հայտնաբերվել, ընդ որում` դրանք հայտնաբերողը նույն ինքը` Միշա Սարդարյանն էր: Աշխատանքից հեռացվել է նաև Անձնագրային և վիզաների վարչության պետի տեղակալ Հայկ Քոչինյանը և մի շարք բաժինների պետեր և պետերի տեղակալներ:
«Առաջին լրատվական»-ը տեղեկացրել էր, որ ՀՀ ոստիկանապետի տեղակալ, ոստիկանության գեներալ-մայոր Արթուր Օսիկյանի գլխին մութ ամպեր են կուտակվում, և դրանց պատճառը Անձնագրային և վիզաների վարչությունում բացահայտված աղաղակող խախտումներն են, որի պատճառով նշված վարչության պետի՝ Նորայր Մուրադխանյանի երկու տեղակալները՝ Արսեն Համբարձումյանն ու Մուշեղ Խաչատրյանն ազատվել են աշխատանքից և ուղարկվել կադրերի ռեզերվ: Խախտումները հայտնաբերվել էին վերջին օրերին ոստիկանապետ Վլադիմիր Գասպարյանի հրամանով Անձնագրային և վիզաների վարչությունում իրականացված ստուգումների արդյունքում: Խախտումներն ամենատարբեր բնույթի են եղել՝ սկսած տեղեկանքների կեղծված լինելուց, վերջացրած քաղաքացիների դիմումներն ամիսներ շարունակ անարձագանք թողնելով:
«Առաջին լրատվական»-ի տեղեկություններով` առաջիկայում տարածքային անձնագրային բաժանմունքները ապակենտրոնացվելու են և գործելու են ոստիկանության բաժինների ենթակայությամբ, ինչպես նախկինում էր: Անձնագրային վարչությունում մնալու է մոտ 120 հոգի, որոնք զբաղվելու են բացառապես քաղաքացիության, վիզաների, օտարերկրացիների հարցերով, իսկ բուն աշխատանքով զբաղվելու են տարածքային, մարզային «պասպորտսեղանները»: Ընդ որում` այս փոփոխությունը վերաբերում է ոչ միայն անձնագրային ծառայությանը, այլև պետական պահպանության գլխավոր վարչությանը: