Ինչպես հայտնի է, ոչ իշխանական քառյակի կառավարությանն ուղղված 12 կետերից բաղկացած պահանջներից մեկը վերաբերում է «Որոտան ՀԷԿ-երի համալիրի» վաճառքին: Քառյակը պահանջում է «բացառել «Որոտան ՀԷԿ-երի համալիր» ՓԲԸ-ի վաճառքը առանց ԱԺ հավանության»:
Մարտի մեկի հանրահավաքում ՀԱԿ ղեկավար Լևոն Տեր-Պետրոսյանը հայտարարել էր. «Ազգային ժողովի շրջանցմամբ մասնավորեցված Որոտանի կասկադը առանց մրցույթ հայտարարելու և իրական արժեքից անհամեմատ ցածր գնով՝ 180 միլիոն դոլարով վաճառվեց ամերիկյան երկու ընկերությունների… Հայաստանն այդպիսով կորցրեց իր էներգետիկ համակարգի պետությանը պատկանող վերջին նշանակալի հանգույցը, ինչը ոչ այլ կերպ, քան դարի հանցագործություն, չի կարելի կոչել»:
Հիշեցնենք, որ հունվարի 29-ին հայտարարվեց «Որոտան ՀԷԿ-երի համալիրի» ամերիկյան «Կոնտուր Գլոբալ» ընկերությանը վաճառքի մասին 180 մլն ԱՄՆ դոլարով, նաև ամերիկայն ընկերությունը պետք է 70 մլն դոլարի ներդրում աներ՝ ՀԷԿ-երը վերազինելու նպատակով: «Կոնտուր Գլոբալ»-ը հայտարարել է, որ բացի համալիրի տեխնիկական անձնակազմի 150 երկարաժամկետ աշխատատեղերից, 150 աշխատատեղեր էլ առաջիկայում կստեղծվեն արդիականացման համար:
Համաձայնագիրը հայկական կողմից ստորագրեց էներգետիկայի նախկին նախարար Արմեն Մովսիսյանը: «Առաջին լրատվական»-ի հարցին` ինչպե՞ս է գնահատում ընդդիմության պահանջը Որոտանի ՀԷԿ-երի վաճառքի հետ կապված, էներգետիկայի նախկին նախարար Արմեն Մովսիսյանը, ով այժմ Սերժ Սարգսյանի խորհրդականն է, երեկ հայտարարեց. «Ինձ մի խառնեք էդ բաներին: Ես չէ, որ պիտի պարզաբանեմ, կառավարությանը դիմեք: Որոտանի Հէկ-երի վաճառքը դեռ չի կայացել»: Մեր հարցին` այսինքն, իր կարծիքով՝ ընդդիմության պահանջն անհի՞մն է, նախկին նախարարը պատասխանեց՝ այո:
Մինչդեռ «Կոնտուր Գլոբալ» ամերիկյան ընկերությունն իր կայքէջում հայտարարում է, որ գնել է «Որոտան ՀԷԿ-երի համալիր» ՓԲԸ-ն, և որ համապատասխան համաձայնագիր է ստորագրել Հայաստանի կառավարության հետ: Բացի դա՝ ԱՄՆ դեսպանատունը ողջունել էր Որոտանի հիդրոէլեկտրակայանների համալիրի գնման վերաբերյալ համաձայնագիրը Հայաստանի Հանրապետության կառավարության ու ամերիկյան «Կոնտուր Գլոբալ» ընկերության միջև: «180 միլիոն ԱՄՆ դոլարի այս ներդրումը երբևէ կատարված ամենախոշոր ամերիկյան մասնավոր ներդրումն է Հայաստանի էներգետիկ ոլորտում: Որոտանի հիդրոէլեկտրակայանների համալիրը ներառում է երեք հիդրոէլեկտրակայան, որոնք ունեն մինչև 405 ՄՎտ էլեկտրականություն արտադրելու հզորություն (Որոտան գետի վրա, Հայաստանի հարավում): Այն Հայաստանի և Կովկասի ամենախոշոր ու ամենաճկուն էլեկտրակայաններից է»,- ասվում էր դեսպանատան հայտարարության մեջ:
Ամերիկյան «Կոնտուր Գլոբալ» ընկերության ներկայացուցիչ Արա Հովսեփյանը, ով «Հյուսիս-Հարավ» ճանապարհային միջանցքի ներդրումային ծրագրի իրականացման կազմակերպություն» ՊՈԱԿ-ի նախկին գլխավոր գործադիր տնօրենն էր, հրաժարվեց որևէ մեկնաբանություն տալ Որոտանի հարցով: Նշենք, որ մամուլում տեղեկություն կա, որ հենց Արա Հովսեփյանն է առաջիկայում նշանակվելու Որոտան ՀԷԿ-երի գլխավոր տնօրեն: Հովսեփյանը երեկ մեզ հետ զրույցում հայտարարեց, որ ինքը տնօրեն չէ և որևէ մեկնաբանություն չունի:
Նշենք, որ Որոտան ՀԷԿ-երի գլխավոր տնօրենն այսօր Սասուն Խաչատրյանն է, ով, ըստ մամուլի տեղեկություների, Սյունիքի նախկին մարզպետ Սուրեն Խաչատրյանի բարեկամն է:
Մամուլում գրվել է, որ Որոտան ՀԷԿ-երի վաճառքի համաձայնագրում ներառված չէ, որ կառավարության 2014-2016 թվականների պետական միջնաժամկետ ծախսերի ծրագրով՝ Գերմանիայի Զարգացման բանկի (KFW) աջակցությամբ ՀՀ կառավարությունը վարկային ծրագիր է իրականացնում` Որոտանի հիդրոէլեկտրակայանների համալիրի վերականգնման համար, որի տևողությունը մինչև 2016 թվականն է: Ըստ այդմ՝ այդ նպատակով այս տարի Որոտանի հզորացմանն է ուղղվելու 7 միլիարդ 523 միլիոն 344.6 հազար դրամ, 2015 թվականին` 7 միլիարդ 188 միլիոն 711 հազար դրամ, 2016 թվականին` 10 միլիարդ 20 միլիոն 883.7 հազար դրամ: