Մոլդովան ձգտում է լինել հուսալի և կանխատեսելի գործընկեր Ռուսաստանի համար, երկուշաբթի հայտարարել է Մոլդովայի վարչապետ Յուրի Լյանկեն ՌԴ ԱԳՆ ղեկավարի տեղակալ Գրիգորի Կարասինի հետ հանդիպման ընթացքում։
«Եվրամիության հետ Մոլդովայի մերձեցման գործընթացը բացարձակապես թափանցիկ է։ Մենք թաքցնելու բան չունենք։ ԵՄ-ի հետ ասոցացման համաձայնագիրը, որը Մոլդովան պատրաստվում է ստորագրել հունիսի 27-ին, չի հակասում Ռուսաստանի հետ համագործակցությանը»,- Լյանկեի հայտարարությունն է մեջբերում մոլդովական կառավարության մամլո ծառայությունը։
Ինչպես ավելի վաղ հաղորդվել էր, Քիշնևի և Մոսկվայի միջև սկսվելու են խորհրդակցություններ տնտեսական փոխհարաբերությունների հեռանկարների հարցի շուրջ։ Կարասինը ճշտել է, որ փորձագետների խմբերը կհանդիպեն հունիսի 10-ին և 11-ին՝ քննարկելու ասոցացման մասին համաձայնագրի բացասական հետևանքների չեզոքացման հնարավորությունները։
