ԱՄՆ նախկին պետքարտուղար Հիլարի Քլինթոնն իր հիշողությունների գրքում պնդում է, որ Ֆրանսիայի նախկին նախագահ Նիկոլյա Սարկոզին իրենց հանդիպումների ժամանակ սիրում էր բամբասել, երկուշաբթի գրում է Politico պարբերականը, որի տրամադրության տակ հայտնվել են քաղվածքներ գրքից։
«Համաշխարհային առաջնորդների մեծամասնությունը անձնական շփումներում սովորաբար ավելի լռակյաց են, քան թվում են։ Բայց ոչ (Ֆրանսիայի նախկին նախագահ Նիկոլյա) Սարոզին։ Նա մշտապես բամբասում էր՝ հարևանցիորեն մյուս առաջնորդներին բնութագրելով խելագարներ կամ թույլեր, մեկը (նրա խոսքերով) թմրանյութերով շշմած «մոլագար» էր, մյուսն ուներ բանակ, «որը չգիտեր ինչպես կռվել», երրորդը «անտաշների» երկար հերթի ներկայացուցիչ էր»,- մեջբերում է պարբերականը հատվածներ գրքի՝ ԱՄՆ-ի և Եվրոպայի հարաբերություններին նվիրված գլխից։
Դրանից բացի, Սարկոզին միշտ ափսոսանք էր հայտնում, որ «դիվանագետների աշխարհը» կազմված է հիմնականում տղամարդկանցից։ «Նա մշտապես հարցնում էր, թե ինչու դիվանագետները, որոնք գնում են նրա հետ հանդիպման, այդքան աններելի ծեր են, գորշ և արական սեռի»,- ասվում է նախկին պետքարտուղարի գրքում։
