ԱԺ նիստի օրակարգը հաստատելու ժամանակ ՀԱԿ խմբակցության պատգամավոր Նիկոլ Փաշինյանը անցյալ շաբաթ Նախիջևանի սահմանին հնչած կրակոցների և այդ կրակոցների հետևանքով երկու զինծառայողների զոհվելու մասին հարց բարձրացրեց:
Նիկոլ Փաշինյանի խոսքով՝ այդ լարվածությունն ու կրակոցները գուցե Աստանայում տեղի ունեցած գագաթնաժողովի հետևանքն էին: Նա ԱԺ նախագահ Գալուստ Սահակյանին առաջարկեց այս շաբաթ սկսված քառօրյայում կազմակերպել խորհրդարանական լսումներ, հրավիրել պատկան մարմիններին և քննարկել, թե ինչու է հիմա լարվածություն ստեղծվել, և արդյոք դրանք կապ ունե՞ն տարածաշրջանային զարգացումների հետ:
Նույն հարցը առաջադրեց նաև ԲՀԿ քարտուղար Նաիրա Զոհրաբյանը և հայտարարեց, որ մայիսի 29-ին ինքը նամակով դիմել է ԱԳ նախարար Էդվարդ Նալբանդյանին՝ իրեն հարմար ձևաչափով քննարկելու Աստանայում տեղի ունեցած իրադարձությունները: Նաիրա Զոհրաբյանի խոսքով՝ պետք ՝ իմանալ, թե ինչու Հայաստանը հայտնվեց նման նվաստացուցիչ վիճակում: «Ուստի ես միանում եմ իմ բոլոր գործընկերներին, որ հրավիրվեն խորհրդարանական լսումներ, թե ինչ տեղի ունեցավ Աստանյում, և ինչ զարգացումներ են սպասվում»,- ասաց Զոհրաբյանը:
Գալուստ Սահակյանը հայտարարեց, որ չորեքշաբթի օրը կառավարության հետ հարցուպատասխանի ժամանակ պատգամավորները կարող են իրենց այդ հարցերն ուղղել արտգործնախարարին: Բացի դրանից՝ նա խոստացավ, որ հունիսի 16-ին կամ 17-ին կփորձեն այդ հարցի շուրջ խորհրդարանական լսումներ հրավիրել:
