«Առաջին լրատվականը» պատրաստվում էր Երևանի վարչական շրջանի ղեկավարների հետ հարցազրույցների շարք անցկացնել, սակայն հանդիպեցինք Երևանի քաղաքապետարանի դիմադրությանը։
Նրանց առաջադրած պահանջներից տպավորություն է ստեղծվում, որ Երևանի քաղաքապետարանը վախենում է իր վարչական շրջանների ղեկավարների ինքնաարտահայտումից։
Այսպես՝ երբ ցանկություն հայտնեցինք Երևանի վարչական շրջանի ղեկավարներից մեկի հետ հարցազրույց անցկացնել և, հարգելով քաղաքապետարանի պահանջը, Երևանի քաղաքապետի մամուլի քարտուղար Շուշան Սարդարյանից փորձեցինք թույլտվություն ստանալ, նա առաջարկեց հարցերը գրավոր ներկայացնել իրեն, որից հետո կորոշի՝ հարցազրույցը թույլատրե՞լ, թե՞ ոչ։ Երբ հետաքրքրվեցինք, թե դա գրաքննության նո՞ր ձև է, նա արձագանքեց՝ սա ոչ թե գրաքննություն է, այլ նորմալ աշխատելաոճ։
Չի բացառվում, որ մամուլի քարտուղարը մեր հարցերին ծանոթանալուց հետո կամ չէր թույլատրի, կամ լավագույն դեպքում վարչական շրջանների ղեկավարների պատասխանները կպատրաստեր, որ նրանք քաղաքապետարանի թույլատրածից ավելի նախադասություններ չշռայլեն։ Ցավալի է, բայց սա հերթական անգամ վկայում է այն մասին, որ ոչ միայն ժողովուրդն է հայտնվել բռնապետության ճիրաններում, այլև բարձրաստիճան ղեկավարները ևս, որոնք նույնիսկ ինքնաարտահատվելու համար պետք է թույլտվություն ստանան իրենց տերերից։ Ավելին, խոսում է այն մասին, որ եթե ցանկացած օղակում ինչ-որ մի պաշտոնյա բացթողումներ կամ չարաշահումներ է անում, դա գալիս է իր վերադասից։ Նրանց ցանկացած վրիպումը այս դեպքում վնասում է ոչ միայն վարչական շրջանի ղեկավարին, այլև նորանշանակ քաղաքապետ Կարեն Կարապետյանին։
