Երեկ երեկոյան Աթենքի կենտրոնում՝ խորհրդարանի դիմաց, անցկացվել է թատերականացված ակցիա՝ ընդդեմ հայտնի հունական լողափերի վաճառքի: Այս մասին հայտնում է RIA Novosti-ն:
Ակցիան նվիրված է եղել շրջակա միջավայրի պաշտպանության համաշխարհային օրվան: Դրա կազմակերպիչը՝ Կանաչների բնապահպանական կուսակցությունը, բողոք է արտահայտել ընդդեմ խորհրդարանում օրինագծի ներկայացման, որը թույլ է տալիս սեփականաշնորհել լողափերը:
Այժմ բոլոր լողափերը գտնվում են պետության իշխանության տակ, դրանց հասանելիությունն ազատ է: ԶԼՄ-ների տվյալներով՝ հունական իշխանությունները մտադիր են 110 լողափ վաճառել: Այդ տարածքներից մի քանիսը ներառված են կենդանի բնության պահպանության ԵՄ-ի Natura 2000 ծրագրում:
Ակցիայի մասնակիցները Սինտագմա հրապարակի շատրվանները ցանցապատել են՝ ստեղծել «մասնավոր լողափ», որի ցուցանակն ազդարարել է, որ մուտքն արժե 8 եվրո:
