Հոլանդիայի Ալմելո քաղաքում հայկական եկեղեցու բակում Հայոց ցեղասպանության զոհերի հիշատակը հավերժացնող հուշարձանի բացումը տեղում թուրքերի, նաև ադրբեջանցիների շրջանում բողոքի մեծ ալիք է բարձրացրել: Հոլանդիայում հայկական կազմակերպությունները համակարգող միության նախագահ Սամվել Մարտիրոսյանն «Առաջին լրատվական»-ի հետ զրույցում նշեց, որ հակառակ այդ դժգոհությանը` հոլանդական իշխանությունը դրա համաձայնությունը տվեց, և հուշարձանը բացվեց:
«Ապրիլի 24-ին տեղի ունեցավ բացումը, որին ներկա էին նաև հոլանդական կառույցների, իշխանությունների որոշ ներկայացուցիչներ: Թուրքական և ոչ միայն թուրքական, այլև ադրբեջանական կառույցների ղեկավարությունը և նրանց անդամները ցույց էին կազմակերպել, նաև պատրաստվում են դատի տալ, որպեսզի անվավեր ճանաչեն Հոլանդիայի քաղաքապետարանի որոշումը, որով տարածքի թույլտվություն են տվել, որպեսզի նման մեծ հուշարձան կառուցվի: Մենք ևս, իհարկե, որպես հայկական կազմակերպությունները համակարգող միություն, պատրաստ ենք այդ հարցի պատասխանները տալ, նաև դատական ատյաններում մեր դիրքորոշումն արտահայտել»,- ասաց նա:
Ռոտերդամ քաղաքում ադրբեջանական գրասենյակի վրա օրեր առաջ եղած հարձակման համար ադրբեջանցիները մեղադրում էին հայերին: Մարտիրոսյանը նշեց, որ հայերն իրականում որևէ առնչություն չեն ունեցել դրա հետ, պարզապես այսօր ադրբեջանցիները պաշտպանական դիրք են գրավել, փորձում են ցույց տալ, թե հայերն են նախաձեռնել: Իրականում ոչ մի հայ դրան որևէ առնչություն չունի: Եթե նման բան լիներ, ապա բոլորը կիմանային, հետևաբար և հայտարարությամբ հանդես կգային: Բայց բոլոր կառույցներում շատ նորմալ, հանգիստ աշխատանքային մթնոլորտ է:
Մարտիրոսյանի խոսքով` թուրքերը Հոլանդիայում շատ են: Հայերի հետ ոչ պաշտոնական կապեր, հարաբերություններ կան, երբեք խնդիրներ չեն ունեցել, հակառակը` ինչ-որ հարցերի շուրջ ցույցեր անելու ժամանակ չեն խանգարել:
Հայկական համայնքներից ամենամեծն Ալմելո քաղաքում է, որտեղ բնակվում է շուրջ 7 000 հայ: Ամստերդամում կան բավական հայեր` թուրքահայեր, իրաքահայեր, իրանահայեր, սիրիահայեր, Հայաստանից եկած հայեր, իսկ Ալմելոյում մեծամասնությունը թուրքահայեր են: «Հայ դատն էլ, իհարկե, շատ մեծ աշխատանք է տանում այդ բոլոր թուրքական անհիմն հայտարարությունների դեմ: Նրանք համապատասխան հայտարարությամբ հանդես են գալիս, բոլոր համայնքները միասնական են, և եթե, Աստված մի արասցե, մի բան փորձեն անել, մենք բոլորս պատրաստ ենք դրա առաջն առնել»,- ասաց նա:
Մարտիրոսյանը նշեց, որ կԿառավարության համակարգում հայեր չկան, սակայն միգրացիայի ծառայությունում հայեր կան, հայ փաստաբաններ, գործարարներ կան, իսկ կառավարությունում հայ չունենալը որևէ խոչընդոտ չի առաջացնում, քանի որ հոլանդական կուսակցականներ կան, որ պատրաստ են աջակցել համայնքին: Միության նախագահը չի կարծում, որ դատարանը քաղաքապետարանի որոշմանը դեմ վճիռ կկայացնի, քանի որ համայնքը որևէ անօրինական բան չի արել, պարզապես իրողությունն են ներկայացրել հոլանդացիներին, որպեսզի ավելի տեղեկացված լինեն` իրականում ինչ է եղել:
«Դպրոցներում ունենք փաստեր, երբ ասել են, որ ավելի շատ հայերն են թուրքերին կոտորել, անգամ իմ երեխան վիճաբանել էր, փորձեցինք գոնե պատմական փաստերով նրանց գիտելիքների պակասը լրացնել: Փառք Աստծո, գրականություն կա նաև անգլերենով: Այստեղ ով շուտ հասցրեց տեղեկատվություն տալ հոլանդացիներին, նրանք այն էլ ընդունում են` առանց երկար-բարակ մտածելու: Այստեղ, իհարկե, կա նաև քաղաքական մեծ խնդիր. թուրքերն ավելի շատ են, քան հայերս: Նրանք խորհրդարանի հետ շաղկապված աշխատում են, իհարկե, մենք էլ վատ չենք աշխատում»,- ասաց նա:
Հայոց ցեղասպանության հուշարձանի մոտ տեղի ունեցածը, ըստ Մարտիրոսյանի, չափազանցված է ներկայացվել: Ցույցին մասնակցողներն ընդամենը 2 000 հոգի են եղել, իրենց հաշվարկներով, ընդ որում` նրանց մեջ մեծ թիվ են կազմել անձինք, ում պարզապես բերել են, ովքեր ազգությամբ թուրք էլ չեն: Բողոքի ցույցն անգամ տեղում` հոլանդական ԶԼՄ-ները չեն կարևորել ու չեն լուսաբանել: Տեղեկատվությունն իրենք` թուրքերը, տարածել են սոցցանցերով:
