Լախդար Բրահիմիի հավանական իրավահաջորդների ցուցակում Սիրիայի հարցով ՄԱԿ-ի հատուկ ներկայացուցչի պաշտոնի համար առկա է հոլանդուհի Սիգրիդ Կաագի անունը: Ներկայումս նա Սիրիայում ՄԱԿ-ի և Քիմիական զենքի արգելման կազմակերպության համատեղ առաքելության հատուկ համակարգողն է: Այս մասին ITAR-TASS-ին հայտնել է համաշխարհային կազմակերպության իրազեկ աղբյուրը:
Աղբյուրի փոխանցմամբ՝ ցուցակում են նաև ԱՊԼ նախկին գլխավոր քարտուղար Ամր Մուսան և Թունիսի նախկին արտգործնախարար Քամել Մորժանը:
Գործակալության զրուցակցի խոսքով՝ ՄԱԿ-ի միանգամից մի քանի անդամ երկրներ ցանկություն են հայտնել Կաագին տեսնել Բրահիմիի իրավահաջորդի դերում: Նա հիանալի գիտի տարածաշրջանը, ազատ տիրապետում է արաբերենին, ինչպես նաև ՄԱԿ-ի Մանկական հիմնադրամի, ՄԱԿ-ի Զարգացման ծրագրի և Պաղեստինցի փախստակաների օգնության ու աշխատանքների կազմակերպման ՄԱԿ-ի մերձավորարևելյան գործակալության հետ աշխատանքի հարուստ փորձ ունի:
Բացի դրանից՝ սիրիական ճգնաժամի մեկնարկից ի վեր նրա առաքելությունը միակն է, որը կոնկրետ արդյունքներ է տվել:
Մեկ այլ աղբյուր նշել է, որ Կաագը ոգևորությամբ չի ընդունել առաջարկը: Նա ցանկանում է աշխատել Մերձավոր Արևելքում, սակայն ոչ Սիրիայում:
