ԱՄՆ-ն պետք է կիրառի հնարավորությունը՝ հասնելու Իրանի հետ վերջնական միջուկային համաձայնագրի կնքմանը: Այս մասին Trend գործակալությանը հայտնել է պետդեպի ներկայացուցիչ Ալան Էյրը:
«Միջանկյալ 6-ամսյա գործարքը կարևոր քայլ է, սակայն դա ընդամենը առաջին քայլն էր: Դա լավ նշան է, որ բոլոր շահագրգիռ կողմերը կատարում են իրենց պարտականությունները՝ գործարքի պայմաններին համապատասխան»,- ասել է Էյրը:
Նրա խոսքով՝ կարևոր է, որ մինչ միջանկյալ գործարքի ժամկետի ավարտը (հուլիսի 20) երկու կողմերը հասնեն համապարփակ համաձայնագրի:
«Ինչպես ասել է ԱՄՆ նախագահ Բարաք Օբաման Վեսթ Փոյնթում իր ելույթի ժամանակ, վերջին տասնամյակում առաջին անգամ հնարավորություն ունենք հասնելու Իրանի հետ կարևոր համաձայնագրի: Սակայն այդ նպատակին հասնելու համար դեռ լուրջ աշխատանք պետք է արվի»,-ընդգծել է Էյրը:
«Իրանը պետք է դժվարին որոշումներ ընդունի՝ նվաճելու միջազգային հանրության վստահությունը միջուկային ծրագրի բնույթի վերաբերյալ»,- ասել է պետդեպի ներկայացուցիչը:
Էյրը նշել է, որ նախկինի պես, կողմերի դիրքորոշումներում վիթխարի տարբերություն կա և անհանգստություն է հայտնել ժամանակի սղությամբ առնչությամբ:
Էյրի խոսքով՝ ԱՄՆ նպատակն այն է, որ բոլոր կողմերը բանակցություններին մոտենան լրջորեն, փոխադարձ հարգանքով և բարի մտադրությամբ, որպեսզի համալիր գործարքը ձեռք բերվի մինչև հուլիսի 20-ը:
