ԱՄՆ պետքարտուղար Ջոն Քերին Լիբանանի քաղաքացիներին կոչ է արել ընտրել երկրի նախագահի, որը կտիրապետի ամբողջ իշխանությանը և կախված չի լինի օտարերկրյա ազդեցությունից: Այս մասին հայտնում է Agence France-Presse-ը՝ հղում անելով ԱՄՆ պետքարտուղարի հայտարարությանը:
Չորեքշաբթի օրը Քերին չհայտարարված այցով ժամանել է Բեյրութ: «Մեզ անհրաժեշտ է օտարերկրյա ազդեցությունից ազատ կառավարություն, նախագահ, որը լիարժեքորեն կտիրապետի ամբողջ իշխանության, կառավարություն, որտեղ նախագահը և խորհրդարանը պատասխանատու են անմիջականորեն ժողովրդի առաջ և այդ ժողովրդի կարիքների համար»,- մամուլի ասուլիսի ժամանակ ասել է Քերին:
Քերին նաև նշել է, որ Լիբանանում ներկայիս քաղաքական փակուղին, երբ երկրի նախագահի պաշտոնը թափուր է, մտահոգություն է առաջացնում: Երկրի նախկին նախագահ Միշել Սուլեյմանի կառավարման ժամկետն ավարտվել է մայիսի 25-ին: Երկրի խորհրդարանը մինչև հիմա նոր նախագահ չի ընտրել:
Ինչպես ավելի վաղ հայտնել էր ԱՄՆ Պետդեպի ներկայացուցիչը՝ նախատեսվում է, որ այցի ընթացքում Քերին կհայտարարի իրենց տարածքում Սիրիայից փախստականներին ընդունած երկրներին՝ Լիբանանին, Թուրքիային, Հորդանանին, Եգիպտոսին և Իրաքին, 290 մլն դոլար օգնություն տրամադրելու մասին: Լիբանանին հատկացվելիք օգնությունը կկազմի 51 մլն դոլար:
