Հունիսի 3-ին ԱՄՆ Կալիֆոռնիա նահանգում անցկացվեցին ընտրություններ: Ինչպես ամեն տարի, այս տարի ևս հայաշատ Գլենդել քաղաքում համաքաղաքային ընտրություններ էին, որոնց մասն են կազմում նաև քաղաքային խորհրդի ընտրությունները: Սակայն մի քաղաքում, որտեղ բնակչության 45 տոկոսից ավելին հայ է, միմյանց դեմ պայքարող հայ թեկնածուները հերթական անգամ կիսեցին հայ ընտրողների քվեները՝ դրանով ճանապարհ հարթելով ոչ հայ թեկնածուի համար:
Պայքարն ընթացավ 5 թեկնածուի միջև՝ քաղաքային խորհրդի 5 անդամներից մեկի տեղի համար: Թեկնածուներից երկուսը՝ Վարդան Կարապետյանն ու Շահե Քյորօղլյանը, ներկայացնում էին հայ համայնքը, իսկ մյուս թեկնածուները ամերիկացիներ էին՝ Ռիկ Բարնզը, Մայք Մոհիլն ու Պաուլա Դևինը, որոնցից ընտրությունների արդյունքում ընտրվեց Պաուլա Դևինը՝ 5111 քվեով, այնինչ երկու հայ թեկնածուների քվեները միասին ավելին էին, քան ներկայումս քաղաքապետարան անցած թեկնածուի արդյունքն է. Վարդան Կարապետյանը ստացել էր 3300, Իսկ Շահե Քյորօղլյանը` 2070 քվե:
«Առաջին լրատվական»-ի հետ զրույցում ԱՄՆ «Ասպարեզ» օրաթերթի գլխավոր խմբագիր Աբո Պողիկյանն ասաց, որ Գլենդելում շարունակվում է հայկական հիվանդությունը, որի համար երկկողմանի պատասխանատվություն է տեսնում: Նրա համոզմամբ՝ նման լուրջ բացթողումների պատասխանատուն նաև Հայ Դատի հանձնախումբն է, որ ինչ-որ կերպ չի կարողանում համոզել թե ընտրողներին, թե թեկնածուներին, որ լավագույնը միասնական թեկնածուով հանդես գալն է:
«Շահե Քյորօղլյանը հարատևորեն ներկայացնում է իր թեկնածությունը և երբեք չի շահում, սակայն միշտ հայկական քվեն կիսելու առաքելությունը իր վրա է վերցնում: Այդպիսով հայ համայնքը ենթակա է նմանատիպ քաղաքական խաղերի ու հաշվարկների: Իսկ մյուս թեկնածուները գիտակցում են ու քաջալերում, որ այդպիսի երկփեղկում լինի հայկական ճակատում:
Այս ընտրություններին այնքան քիչ մարդ քվեարկեց, որ հաղթանակը հեշտ պետք է լիներ ապահովելը, ափսոս էր: Ես ամեն օր եմ ասում, որ մեր միասնական դիրքորոշումը և հաղթանակը կապ ունեն մեր ներկայության և ընդհանրապես մեր վիճակի հետ. չի հաջողվում այս գիտակցումը գործնականացնել»,- ասաց Աբո Պողիկյանը:
Տեղեկացնենք, որ քաղաքային խորհրդի անդամները քաղաքապետի պաշտոնը ստանձնում են ռոտացիոն սկզբունքով, և եթե ընտրություններում ընտրվեր հայ ներկայացուցիչներից մեկը, ապա քաղաքային խորհրդում մեծամասնություն կստանային հայերը, քանի որ նախորդ տարի քաղաքային խորհրդի ընտրությունների արդյունքում քաղաքային խորհրդի կազմում ընդգրկվել էին Զարեհ Սինանյանն ու Արա Նաջարյանը:
