ԱՄՆ վարչակազմը հավելյալ 290 մլն դոլար է հատկացրել սիրիացի փախստականների օգնությանը: Այս մասին ասվում է Պետդեպի հաղորդագրությունում՝ փոխանցում է ITAR-TASS-ը:
Մասնավորապես, ինչպես հայտնում են Պետդեպում, նոր տրանշը նախատեսում է 135 մլն դոլարի հատկացում պարենային աջակցությանը՝ Պարենամթերքի համաշխարհային ծրագրի շրջանակում: Բացի այդ, 133 մլն դոլարը տրամադրվում է որպես մարդասիրական օգնություն՝ ոչ կառավարական կազմակերպությունների միջոցով:
Համաձայն Պետդեպի հաղորդագրության՝ Սիրիայում ներքին տեղահանվածների անմիջական օգնությանը կուղղվի 169 մլն դոլար: Խոսքը սնդի, դեղորայքի և առաջին անհրաժեշտության պարագաների մասին է: Եվս ավելի քան 121 մլն դոլար կտրամադրվի սիրիական փախստականներին ընդունած երկրներին՝ որպես մարդասիրական օգնություն: Խոսքը Լիբանանի, Հորդանանի, Թուրքիայի, Իրաքի և Եգիպտոսի մասին է:
Հաղորդագրությունում ընդգծվում է, որ ընդհանուր առմամբ ԱՄՆ-ը սիրիական ճգնաժամի մեկնարկից ի վեր մարդասիրական ծրագրերի համար հատկացրել է ավելի քան 2 մլրդ դոլար:
