Հունիսի 1-ի գիշերը Նուբարաշենում դանակահարված 22-ամյա Վանուշ Ալեքսանյանը թեև այսօր իրեն նախորդ օրերի համեմատ փոքր-ինչ ավելի լավ էր զգում, բայց խոսել չէր կարողանում: Նա նախորդ օրը վիրահատվել է Էրեբունի բժշկական կենտրոնում, հեռացվել է տղայի փայծաղը: Նրա վիճակը գնահատվում է ծանր, բայց կայուն: Վանուշի առողջական վիճակի հետ կապված տեղեկություններն այսօր «Առաջին լրատվական»-ին փոխանցեցին հիվանդանոցից:
Մեր այցելության պահին Վանուշի մոտ միայն հայրն էր՝ Անդրանիկ Ալեքսանյանը: Նա ասաց, որ տղայի հետ կատարված դեպքից հետո շոկի մեջ է: Հայրը դժվարությամբ էր ընկալում մեր հարցերը և դժվարանում էր դրանց պատասխանել:
Բողոքելո՞ւ են, որ մեղավորը պատժվի՝ հարցրինք Անդրանիկ Ալեքսանյանին. «Ոչ, ես մինչև էդ հանցագործին չտեսնեմ, չեմ կարող ասել: Ինչ ուզում ա լինի՝ իմ սաղ ուշադրությունը իմ որդին ա»,- ասաց նա:
Վանուշի հայրը նշեց, որ այս օրերին Օսիպյանների կողմից իրենց որևէ օգնություն, հիվանդանոցային ծախսերը փոխհատուցելու առաջարկ չի եղել:
Նշենք, որ արդեն իսկ հաստատվել է, որ վիճաբանության ժամանակ Վանուշին դանակահարել է Երևանի փոխոստիկանապետ Վալերի Օսիպյանի եղբորորդին՝ 22-ամյա Սեդրակ Օսիպյանը, որի նկատմամբ հետախուզում է հայտարարվել, իսկ կալանավորումը ընտրվել որպես խափանման միջոց: Փաստի առթիվ էլ հարուցվել է քրեական գործ ՀՀ քրեական օրենսգրքի 112 հոդվածի 1-ին մասի հատկանիշներով:
