Այսօր տեղի ունեցավ «Գրանիշ» գրական հանդեսի չորրորդ համարի շնորհանդեսը:
«Գրանիշ» գրական ակումբի հիմնադիր, գրող Կարեն Անտաշյանը «Առաջին լրատավական»-ի հետ զրույցում նշեց, թե ինչով է պայմանավորված այս համարում քաղաքացու, քաղաքացիական հասարակության կարևորումը:
«Մենք հիմա ապրում ենք մի ժամանակում, որտեղ գրողի արմատական վերարժևորում է արվում, այսինքն՝ արվեստագետի հանրային դիրքավորման և այդ նույն գործչի հանրային վերաբերմունքի: Գրական գործիչը նույնպես իր հանրային դիրքավորման վերարժևորման կարիքն ունի, որովհետև շատերը հին սովետական մտայնությամբ, երբ հանրային կարևորության հարց է ծագում, միանգամից ասում են՝ ուր են մեր մտավորականները, մինչդեռ իրականում Խորհրդային միության կողմից անվանադրված և ստեղծված, ֆինանսավորված շերտը վաղուց գոյություն չունի: Մենք վաղուց չունենք այդպիսի առանձին սոցիալական շերտ, ունենք մարդիկ, անհատներ, գործիչներ՝ մեծ կամ փոքր խմբերում միավորված, որոնք զբաղվում են գրականությամբ, և դա իսկական կենդանի գործընթաց է»,- ասաց Կարեն Անտաշյանըև՝ հավելելով, որ նրանք շատ լուսանցքային դիրքում են հայտնվել, ինչպես ամբողջ աշխարհում է:
Նրա խոսքերով՝ ամբողջ աշխարհում ինտելեկտուալ արդյունք ստեղծող խմբակները և նրանց ստեղծագործությունները շատ փոքր սպառման դաշտում են, չնայած աշխարհում կա նաև փոփ մշակույթը գրականության մեջ, բայց մեզ մոտ դա էլ չկա:
«Գրականությամբ ապրող մարդիկ լուսանցքային են, և նրանց չկարդալով նման հարցադրում անելն արդեն խզում է առաջացնում: Մեր համարը նվիրված է հենց այդ տեսակետների երկատմանը, երբ մի խումբը պնդում է, որ գրողը՝ իբրև հանրային հնչեղության խոսք արտադրող մեկը, պետք է և իր գրականությամբ, և քաղաքացիական կեցվածքով լինի հասարակության հետ օպերատիվ լրահոսում, և ունենք մի խումբ, որը պնդում է, որ գրականությունն ավելի մեծ տարածաժամանակային ընդգրկում ունի և չպիտի այսպես տարվի լրահոսում հայտնվելու գայթակղությամբ, որովհետև պարզ չէ, թե նրա ստեղծած գրական արժեքը երբ փոխազդեցության մեջ կմտնի հասարակության հետ»,- ասաց նա՝ նշելով, որ պատմությանը հայտնի են այդպիսի դեպքեր, օրինակ՝ Կաֆկայի դեպքը, երբ նրա ստեղծագործությունը նրա մահվանից շատ հետո է դարձել հանրահռչակ, այսինքն՝ նրա ժամանակը ուշ է եկել:
Հարցազրույցն ամբողջությամբ՝ տեսանյութում:
