Բացառապես հողագործությամբ հարստացած վարչապետ Հովիկ Աբրահամյանը Երևան քաղաքում՝ Մանումենտում, Ազգային ժողովի նմանությամբ կառուցած շքեղ առանձնատնից բացի մի այդպիսի առանձնատուն էլ ունի իր ծննդավայրում՝ հայրենի Մխչյանում: Հսկայական եղևնիներով շրջապատված առանձնատանը ապրում է միայն Հովիկ Աբրահամյանի հայրը: Իսկ հարևանությամբ գտնվում է եղբոր տներից մեկը: Քիչ ավելի հեռու եղբայրը՝ Ջոնիկ Աբրահամյանը, կառուցում է մի նոր առանձնատուն:
Երբ մխչյանցիներից հետաքրքրվում էինք, թե որն է Հովիկ Աբրահամյանի և նրա եղբոր տունը, նրանք զարմացած հարցնում էին՝ ո՞ր տունը, իրենք մի քանի հատ տուն ունեն գյուղում, հատկապես վարչապետի եղբայրը՝ Ջոնիկը, որը նաև Մխչյանում տեղակայված «Արտաշատ-Վինկոն» գինու, կոնյակի գործարանի սեփականատերն է:
Հակառակ այդ ամենի, մխչյանցիները մեզ հետ զրույցում մեծ ոգևորությամբ հաստատում էին Հովիկ Աբրահամյանի այն միտքը, որ նա հողագործությամբ է հարստացել: «Հա, հողի հետ մեծ սեր ուներ»,- փաստում էին գյուղացիները՝ չկարողանալով պատասխանել հարցին, թե այդ դեպքում իրենք ինչո՞ւ նմանապես չեն հարստանում, երբ առավոտից գիշեր հողի հետ կռիվ են տալիս:
Նշենք, սակայն, որ Հովիկ Աբրահամյանի՝ ԱԺ նախագահ եղած ժամանակ հայտարարագրված եկամուտները գերազանցում էր նախկին վարչապետի և Սերժ Սարգսյանի եկամուտներին:
Իսկ Վարչապետի պաշտոնը ստանձնելուց հետո Հովիկ Աբրահամյանի միայն դրամական միջոցները կազմում են 269 մլն դրամ և 1 միլիոն 940 հազար դոլար: Աբրահամյանի՝ աշխատավարձից ստացած եկամուտները կազմում են 4 միլիոն 110 հազար 330 դրամ, իսկ այլ եկամուտներից՝ 40 միլիոն դրամ: Իսկ թե այդ այլ եկամուտները որտեղից են գոյանում՝ հայտարարագրում նշված չէ: Նշենք, որ ըստ հայտարարագրի՝ Աբրահամյանը չունի ո՛չ սեփական բիզնես, ո՛չ բաժնեմաս, ո՛չ ավտոմեքենա և նույնիսկ ժառանգաբար անցած որևէ թանկարժեք իր: Ունի ընդամենը 3 բնակարան և մեկ ավտոտնակ:
Նշենք, սակայն, որ միայն մամուլի հրապարակումների համաձայն` Աբրահամյաններին են պատկանում մի քանի տասնյակ ընկերություններ և բիզնեսներ, որոնք դուրս են մնացել հայտարարագրից: Ինչպես, օրինակ, «Արտաշատ-Վինկոն» գինու գործարանը, Արտաշատի տրիկոտաժի և մեխանիկական գործարանները, Շահումյան գյուղում գտնվող՝ Արտաշատի շարժական մեքենայացված շարասյունը, Շահումյանում գտնվող 5-րդ տրեստի ավտոպարկը, Արտաշատի կենցաղսպասարկման կոմբինատը, Արտաշատի «Սիրիուս» գործարանը, նախկին զինվորական գործարանը, որը հետագայում վերածվեց շուկայի և հիմա ամբողջապես թալանվել է, Մխչյանում գտնվող ATK-ն, ավտոձեռնարկությունը, Մխչյանի բետոնի գործարանը, Արտաշատի նախկին կենցաղսպասարկման շենքը, որը հետո դարձավ խաղատուն, «Արտաշատ» գաստրոնոմը, Արտաշատի հին բաղնիքը՝ 1 հեկտար հողատարածքով, Նարեկ, Քաղցրաշեն գյուղերի տարածքում շուրջ 200 հեկտար հողակտոր, Արարատի մարզից մինչև Սյունիքի մարզը ներառյալ՝ Co գազի տեխզննությունը, Արտաշատի շրջանում գործող 6 և բազմաթիվ շարժական գազալցակայաններ, Արտաշատի հյուրանոցն ու ռեստորանը և այլն: «Էս մարզում ինչ կա՝ Աբրահամյաններին ա»,- տեսախցիկից այն կողմ անկեղծացավ մխչյանցիներից մեկը: