Ստեփան Դեմիրճյանի ղեկավարած ՀԺԿ-ի գրասենյակում երեկ կայացավ Հազգային կոնգրեսի և ԲՀԿ ներկայացուցիչների հանդիպոմը: Շորջ մեկ ժամ տևած հանդիպմանը ՀԱԿ-ից մասնակցում էին Կոնգրեսի համակարգող Լևոն Զուրաբյանն ու Տեր-Պետրոսյանի գրասենյակի ղեկավար Ավետիս Ավագյանը, ԲՀԿ-ից` պատգամավորներ Նաիրա Զոհրաբյանն ու Վարդան Օսկանյանը:
Հանդիպումից հետո ի պատասխան «Հայկական ժամանակ»-ի թղթակցի հարցի` պայմանավորվածություններ ձեռք բերվե՞լ են, և հնարավո՞ր է համագործակցություն, Օսկանյանը պատասխանեց. «Իմ գնահատականով, հանդիպումը շատ լավ անցավ, գիտեք, որ նաև ՀԱԿ-ի կողմից ներկայացված օրակարգ կա, 2 օրակարգերի բոլոր կետերը քննարկվել են, կարող եմ ասել, որ, համենայնդեպս, ընդհանրություններ կան»: Այսինքն, ՀԱԿ-ը կո՞ղմ է խորհրդարանական համակարգի անցնելուն՝ հարցին պատասխանեց. «Դա մանրամասների մեջ է մտնում, հետո կխոսենք»: Չե՞ք բացառում, որ համատեղ զանգվածային միջոցառում կարող եք անել` հարցին էլ Օսկանյանը պատասխանեց. «Օրակարգային բոլոր խնդիրները քննարկել ենք, մանրամասների մասին դեռևս չենք կարող խոսել»: Ասաց, որ հաջորդ փուլում կարող են խոսել նախագահի թեկնածուների մասին:
ՀԱԿ համակարգող Լևոն Զուրաբյանը չբացառեց, որ առաջիկա նախագահական ընտրություններոմ ՀԱԿ-ն ու ԲՀԿ-ն կարող են հանդես գալ միասնական թեկնածուով: Հարցին` ո՞վ է ում սատարելու, ԲՀԿ-ն՝ Կոնգրեսի թեկնածուի՞ն, թե՞ Կոնգրեսը ԲՀԿ-ի, Զուրաբյանը չպատասխանեց. «Հիմա դուք ուզում եք մտնել դետալների մեջ, որոնց պարզաբանումը եթե անեմ, միայն կվնասի բանակցությունների ընթացքին: Ուստի, ես սրանից ավելի մանրամասն չեմ ցանկանում այդ թեմայի մասին խոսել»: Մյուս հարցին` չե՞ք բացառում, որ համատեղ զանգվածային միջոցառում անեք, նա պատասխանեց. «Ինչո՞ւ պիտի բացառենք»: Ե՞րբ կարող է դա տեղի ունենալ` ճշտող հարցին էլ պատասխանեց. «Հիմա դժվար է նման բան ասել, բայց եթե կայանա նման բան, նախագահական ընտրություններ կոնտեքստում ամենաճիշտ ժամանակաշրջանը կլինի»:
Հ.Գ. ԲՀԿ-ի առաջարկած օրակարգի շուրջ, այն է` անցում կառավարման խորհրդարանական համակարգի և 100 տոկոս համամասնական ընտրակարգի, շաբաթ օրը կոնսուլտացիաներ են եղել նաև ՀՅԴ-ի և ԲՀԿ-Ի միջև, իսկ երեկ երեկոյան` նաև «Ժառանգության» և ԲՀԿ-ի: Երեկ ԲՀԿ-ն կոնսուլտացիաների հրավեր է ուղարկել նաև ՀՀԿ-ին:
