ԱԺ-ն երեկ մերժեց «Հարսնաքար» ռեստորանում և «Առագաստ» սրճարանում տեղի ունեցած հանցագործությունների առնչությամբ ժամանակավոր հանձնաժողով ստեղծելու նախաձեռնությունը` առանց հարցի քննարկման: «Հրապարակ»-ը հիշեցնում է, որ ուրբաթ օրը Աժ պետաիրավական հարցերի հանձնաժողովում նախաձեռնությունը չէր արժանացել դրական եզրակացության, որի դեպքում հարցը մեխանիկորեն կմտներ ԱԺ օրակարգ, կքննարկվեր, հասարակական լայն հնչեղություն կստանար: Դրական եզրակացության համար պակասել էր մեկ ձայն: Հանձնաժողովում հարցի քննարկման ժամանակ բացակայել էր ԲՀԿ-ական Տիգրան Ուրիխանյանը` արժանանալով Զարուհի Փոստանջյանի «թռել է» գնահատականին և հայտարարություններին, ինչին ի պատասխան հետևել էր Ուրիխանյանի հայտարարությունը` ուղղված «պետության հաշվին արտասահմաններում «թրև եկող» պատգամավորուհուն, ով միակն էր, որ դեմ քվեարկեց «սաֆարովյան լկտիության» դեմ ուղղված ԱԺ հայտարարությանը»:
Ակնհայտ էր, որ ԱԺ խորհրդարանական մեծամասնությունը մերժելու է «Ժառանգության» նախագիծը` ժամանակավոր հանձնաժողովի մասին: Իսկ ԲՀԿ-ն երեկ ԱԺ-ում կողմ քվեարկեց այդ նախագծին: Պրն. Ուրիխանյանից «Հրապարակ»-ի թղթակիցը փորձել է ճշտել` նա միանմա՞ն է համարում «Հարսնաքարի» և «Առագաստի» դեպքերը: «Հանրությանը հուզող ցանկացած խնդիր պետք է միանման դիտարկվի և առավելագույն թափանցիկ դառնա»,- ասել է նա:
