Եվրահանձնաժողովը Բուլղարիայի կառավարությանը խնդրել է դադարեցնել «Հարավային հոսք» գազատարի վրա տարվող աշխատանքները՝ մինչև որոշում ընդունվի ԵՄ օրենքներին դրա համապատասխանության մասին, հայտնել է եվրահանձնակատարի ներքին շուկաների հարցերով պաշտոնական ներկայացուցիչ Շանտալ Հյուզը՝ հունիսի 3-ին հայտնում է «Նովոստի Բոլգարիին»:
Նա նշել է, որ Բուլղարիան կպատժվի «Հարավային հոսք» գազատարի նախագծի իրագործման ընթացքում կապալառուների և ենթակապալառուների որոշման մրցույթների գործընթացներին խախտման դեպքում:
Առաջինը, ինչում մեղադրվում է Բուլղարիան, գազատարի մայրցամաքային մասի նախագծումն է, ֆինանսավորումը և շինարարությունն առանց մրցույթ անցկացնելը՝ խախտելով ընդհանուր եվրոպական կանոնները: Աշխատանքի բոլոր լիազորությունները կասկածելի կերպով ստացել է «Հարավային հոսք-Բուլղարիա» ընկերությունը:
Երկրորդը, որ նկատի է առնվում, այն է, որ «Հարավային հոսք-Բուլղարիա» ընկերությունը գազային նախագծի իրականացման ենթակապալառուներին նշանակել է առանց բաց մրցույթի, ինչը ևս հակասում է ԵՄ-ի կանոններին: Դրա հետ մեկտեղ, ենթակապալառուներ են ընտրվել ռուսական կամ ռուս-բուլղարական ընկերությունները:
Այսպիսի պայմաններում նախագծի իրականացումը չի կարող համարվել օրինական, և Եվրահանձնաժողովն այն կդադարեցնի, մինչև Բուլղարիան բոլոր մրցութային գործողություններն անցկացնի ԵՄ օրենսդրության պահանջներին համապատասխան:
Հիշեցնենք՝ հունիսի 1-ին եվրահանձնակատար Գյունթեր Էթինգերը հայտարարել էր, որ «Հարավային հոսքի» շինարարությունը կախված կլինի Ուկրաինայի նկատմամբ Ռուսաստանի դիրքորոշումից:
Իսկ Բուլղարիայի էներգետիկայի նախարար Դրագոմիր Ստոյնևի կարծիքով՝ նախագծի իրագործումը չպետք է կախված լինի Ռուսաստանի և Ուկրաինայի միջև առկա և ապագա հարաբերություններից, հայտնում է ITAR-TASS-ը:
«Մենք պետք է բնական գազի փոխադրման երաշխիք ունենանք: Այս նախագիծը բուլղարական չէ, այլ եվրոպական: Մենք մշտական երկխոսություն ենք վարում Եվրահանձնաժողովի հետ, և հունիսի 13-ին նրա ներկայացուցիչները կժամանեն Բուլղարիա՝ քննարկելու գազատարի ջրային մասի վերաբերյալ առկա հակասությունները, որպեսզի դրանք հարթվեն»,- ասել է նախարարը՝ հավելելով, որ Բուլղարիան հույս ունի Եվրահանձնաժողովի հետ գտնել որոշում, որը հարմար կլինի բոլոր կողմերին:
Ստոյնևի կարծիքով՝ «հիստերիայի պատճառ չկա»: Միակ բանը, որ նրան վրդովեցնում է, Եվրահանձնաժողովի կարծիքն է, որ «Հարավային հոսքը» կարող է խնդիր լինել Ռուսաստանի և Ուկրաինայի բանակցություններում: Նրա խոսքով՝ եվրոպական երկրները չպետք է այդ հակամարտության գերիները լինեն:
