Անցած երկու օրերին Եմենում կառավարական զորքերի և շիա ապստամբների բախման հետևանքով ավելի քան 120 մարդ է զոհվել: Այս մասին հայտնում է ITAR-TASS-ը՝ հղում անելով արաբական ԶԼՄ-ներին:
Բանակը փորձում է շիա ապստամբներին հեռացնել երկրի մայրաքաղաք Սանայից 50 կմ հեռու՝ Օմրան բնակավայրի մոտ նրանց գրաված դիրքերից, իսկ ապստամբները մտադիր են այդ դիրքերից հարձակվել մայրաքաղաքի վրա:
Կառավարական զորքերը ներգրավել են օդուժին, նաև սուննի «Ալ-Իսլահ» խմբավորումից իրենց կողմնակիցներին:
Շիա ապստամբները վերջերս ակտիվացրել են Եմենի հյուսիսում զինված գրոհները: Նրանք շիա մահմեդականներ են և ինքնահռչակ «իմամ» Ալի Հուսեյն ալ-Հոուսիի կողմնակիցները, որը 2004 թվականին հակակառավարական խռովություն բարձրացրեց:
Ապրիլի 20-ին Եմենի իշխանությունները մասշտաբային հակակահաբեկչական գործողություն են սկսել երկրի հարավում:
