Լեհաստանի ԱԳՆ ղեկավար Ռադոսլավ Սիկորսկին կարծում է, որ իր երկրի տարածքում պետք է ԱՄՆ-ից և Եվրոպայի երկրներից ավելի շատ զինծառայողներ տեղակայվեն: Այս մասին նա հայտարարել է ամերիկյան CNN հեռուստաընկերությանը տված հարցազրույցում:
«Մենք ուրախ կլինեինք մեզ մոտ ընդունել ավելի շատ զինվորների՝ ինչպես Եվրոպայից, այնպես էլ Միացյալ Նահանգներից»,- ասել է Սիկորսկին:
«Մենք կարծում ենք, որ ՆԱՏՕ-ի անդամ երկրների տարածքում անվտանգության մակարդակը պետք է շատ թե քիչ հավասար լինի,- ասել է նա:- Ներկայումս մենք ՆԱՏՕ-ի բազաներ ունենք, որոնք սառը պատերազմի ժառանգություն են: Նրանք այն վայրերում են, որտեղ օգտակար էին Խորհրդային Միության հետ հակամարտության ժամանակ, միևնույն ժամանակ՝ հաշվի չեն առնվում վերջին 25 տարիներին տեղի ունեցած իրադարձությունները: Պետք է զբաղվել դրանով»:
Սիկորսկին նաև խոսել է Ուկրաինայում տիրող իրավիճակի մասին: Նա վստահություն է հայտնել, որ նախագահական ընտրություններում հաղթած Պյոտր Պորոշենկոն հենց այն մարդն է, ով կարող է կարգավորել ճգնաժամը երկրում: