Air France ընկերության ԱՊՀ տարածաշրջանի կոմերցիոն տնօրեն Սիմոն Սխոլտեն արդեն երկրորդ անգամ է Հայաստանում, այս անգամ առիթը հոբելյանական էր:
Այս տարի Air France ընկերությունը միաժամանակ երկու հոբելյան է նշում՝ KLM և Air France միավորման տասը տարին և Air France-ի 80-ամյակը:
Արդեն ութ տարի է՝ Air France-ը շաբաթական Երևան-Փարիզ երեք չվերթ է իրականացնում: Սիմոն Սխոլտեի խոսքով՝ անցած տարի Երևան-Փարիզ չվերթից օգտվել են մոտավորապես 45.000 ուղևորներ: Ավելին՝ ընկերությունը ավելացնում է Երևան-Փարիզ ուղղությամբ չվերթների հաճախականությունը. «Եթե նախկինում ունեինք շաբաթական չորս չվերթ, այժմ ունենալու ենք վեց չվերթ՝ մայիս, հունիս և սեպտեմբեր ամիսներին, իսկ հուլիս և օգոստոս ամիսներին արդեն կլինի շաբաթական յոթ չվերթ»,- ասաց Սիմոն Սխոլտեն: Դժվար է ասել ամեն չվերթի հետ կապված ինչ գին կլինի, բայց նախորդ տարվա համեմատ այս տարի գները միանշանակ ավելի ցածր են, ինչը պայմանավորված է չվերթների ավելացմամբ:
Air France-ի 80-ամյա կենսագրությունը փաստում է, որ այն աշխարհի ամենահին ավիաընկերություններից մեկն է:
Հայաստանում Ֆրանսիայի դեսպանատան ներկայացուցիչ Իզաբել Գինելը նշեց, որ թռիչքների համար իդեալական ժամանակակարգ է ընդունված, քանի որ Փարիզում հայտնվելուց հետո ուղևորները կարող են իրենց երթուղին շարունակել, իդեալական բոլոր պայմանները ի մի են բերված գործարար աշխարհին և զբոսաշրջիկներին լավագույն սպասարկում մատուցելու համար:
«Զվարթնոց» միջազգային օդանավակայանում երեկ տոնական տրամադրություն էր: «Աստղերը երկնքի և երկրի միջև. Հպանցիկ հայացքներ» խորագրով լուսանկարների ցուցահանդեսի բացումը տեղի ունեցավ, որտեղ Air France-ի ֆոտոարխիվի մի մասը ներկայացվեց, որը նվիրված էր ավիաընկերության պատմությանը և նրա աշխարհահռչակ ուղևորներին: Շուրջ 70 լուսանկարից բաղկացած ցուցահանդեսը ներառում էր հանրահայտ մարդկանց, այդ թվում՝ մեր հայրենակցին՝ Շառլ Ազնավուրին, ինչպես նաև՝ Ֆեդերիկո Ֆելինիին, Վալենտինա Տերեշկովային և այլոց:
Ավելի ուշ Air France-ի տարբեր տարիների համազգեստների դեֆիլե ներկայացվեց: Սիմոն Սխոլտեն նշեց, որ սկսած 1946-ից ընկերության համազգեստների ստեղծմանը մասնակցել են նորաձևության այնպիսի տներ, ինչպիսիք են Նինա Ռիչին, Պիեր Կարդեն, Քրիստիան Դիորը, իսկ վերջինը՝ 2005-ին ֆրասիացի հայտնի դիզայներ Քրիստիան Լակրուան է ստեղծել: