«Առաջին լրատվական»-ի զրուցակիցն է ԲՀԿ խմբակցության անդամ Միքայել Մելքումյանը:
– Սերժ Սարգսյանը Հանրապետական կուսակցության համագումարի ժամանակ հայտարարեց, թե մարդիկ, ովքեր խնդիրներ են ունենում, ոչ թե պետք է մտածեն` ում և ինչպես դիմել, այլ պետք է փնտրեն իրենց շրջապատի հանրապետականին: ԲՀԿ-ն կամ ԲՀԿ ղեկավար Գագիկ Ծառուկյանն էլ ասում է` դիմեք մեզ: Ձեր կարծիքով` խնդիրներ ունեցող մարդիկ ո՞ւմ պետք է դիմեն:
– Նախորդ կառավարության հրաժարականի հիմքում եղավ նախագահի կողմից երկու հարցադրում, թե պետք է բարձրացնել վստահությունը գործադիրի նկատմամբ և ապահովել տնտեսական աճ: Քանի որ ՀՀԿ-ն իշխող կուսակցություն է, և իրենց կապը կառավարության հետ շատ սերտ է, ուրեմն որպեսզի կառավարության նկատմամբ վստահությունը մեծանա, պետք է ոչ թե տեղի բնակիչը գա հասնի կենտրոնական կառավարություն, այլ դիմի իր հանրապետական համայնքապետին, իրենց կառույցին, որպեսզի նրանք այդ խնդիրները տեղ հասցնեն ու լուծեն: Այսինքն` գործընթաց, որը կբարձրացնի վստահությունը կառավարության նկատմամբ և կպարտադրի իր կուսակցությանը լուծել բնակչության հարցերը:
– Իսկ ո՞ր դեպքում մարդիկ պետք է դիմեն Գագիկ Ծառուկյանին:
– Գ. Ծառուկյանը միշտ պատրաստ է իր կարողությունների շրջանակներում աջակցել մարդկանց: Չէ՞ որ ԲՀԿ-ն ունի իր ծրագրերը:
– Բայց եթե սկսեն դիմել ՀՀԿ-ին, վտանգ չի՞ առաջանա, որ այլևս չեն դիմի ԲՀԿ-ին:
– Ես չեմ կարծում, որ բոլոր կողմերը կարող են լուծել բնակչության բոլոր հարցերը: Միշտ էլ մի մեծ չբավարարված պահանջարկ մնալու է: Դրանից ելնելով՝ ինչքան դիմեն, ինչքան օգնեն, այնքան օգուտ կլինի ժողովրդին: Այնպես որ, ովքեր էլ լուծեն, փառք ու պատիվ այն մարդկանց, ովքեր կլուծեն:
– Հիմա եթե Գ. Ծառուկյանը ելույթներ ունենա, էլ չի՞ կարող ասել, որ եթե մարդիկ խնդիրներ են ունենում, թող փնտրեն տարածքի ԲՀԿ-ականին:
– Ինչու չի կարող, այդպես էլ լինում է: Բա մենք էլ ունենք համայնքապետեր, քաղաքապետեր, տարածքային կառույցներ: Վերջին հաշվով, մենք ունենք մեծ խմբակցություն, ում միջոցով կառավարությանը հարցադրումներ ենք անում, որ հարցերին լուծում տան: Եվ քաղաքացու խնդիրները պահել ենք մեր ուշադրության կենտրոնում:
– Բայց եթե անընդհատ ՀՀԿ-ին դիմեն, և ՀՀԿ-ն լուծի այդ խնդիրները, էլ ԲՀԿ-ին դիմելու ի՞նչ կարիք կա:
– Դուք կասկածո՞ւմ եք, որ որևէ մեկը այս երկրում չի կարող լուծել բոլոր խնդիրները:
– Այսինքն` մի մասը պետք է դիմի ՀՀԿ-ին, մյուս մասը՝ ԲՀԿ-ի՞ն: Եվ այդ երկու կուսակցությունները խնդիրների դաշտը փակեն:
– Մասի խնդիր չկա, ես կարծում եմ, որ նույնիսկ երկուսով չեն կարող փակել ամբողջ դաշտը, որովհետև հանրապետությունում բազմաթիվ են չլուծված խնդիրները: Եվ անկախ կուսակցական պատկանելությունից, մեծամասնական, համամասնական կարգավիճակից` որ պատգամավորը, ես, իմ մյուս բոլոր գործընկերները կարող ենք լուծել այդ խնդիրները, փառք ու պատիվ նրանց:
– Միգուցե Ս. Սարգսյանը ցանկանում էր ասել՝ դիմեք ՀՀԿ-ին, որպեսզի չդիմեք Գ. Ծառուկյանին:
– Ո՛չ, ո՛չ: Ես ասացի, քանի որ նախորդ կառավարության հրաժարականի հետևանքով վստահությունը նվազել էր, նա ասում է` դիմեք ձեր տարածքի ՀՀԿ-ականին: Եվ այդպիսով ցանկանում է, որ ներքին կառույցի միջոցով այդ վստահությունն աճի:
– Փաստորեն, մեր երկրում եթե մարդիկ խնդիրներ ունեն, պետք է դիմեն ոչ թե որևէ պետական կառույցի, այլ ՀՀԿ-ին կամ Գ. Ծառուկյանին: Այդպիսով պետական կառույցների դերը չի՞ նսեմանում:
– Իհարկե, կատարյալ իրավիճակում դուք իրավացի եք, եթե բոլոր մարմիններն իրենց գործառույթները կատարելու ռեսուրս ունենան: Իսկ դուք համոզվա՞ծ եք, որ տեղական կառույցներն այդ ռեսուրսն ունեն, որ լուծեն: Այսինքն` թոշակը չի բավարարում, աշխատատեղ չկա: Սա խողովակներից մեկն է, բայց ոչ մենաշնորհային խողովակ:
– Իսկ Ս. Սարգսյանի այդ հայտարարությունը չի՞ նշանակում, որ հանրապետության նախագահն ինքն է պետական կառույցների դերը նսեմացնում, և որ կուսակցություններն այսօր ավելի հզոր են ու հարցեր լուծող, քան պետական կառույցները:
– Չեմ կարծում:
– Նախագահը մեկ այլ հայտարարություն արեց, թե Մելիք-Ադամյան 2-ում պետք է ուժեղանա վերլուծական միտքը…
– Թող ուժեղանա:
– Հնարավո՞ր է, դա ուղղված է Գ. Ծառուկյանի այն հայտարարությանը, թե առաջիկա համապետական ընտրություններին հաջողությունը շրջանցելու է Մելիք-Ադամյան 2-ը:
– Ես ազնիվ, արդար, քաղաքակիրթ մրցակցության կողմնակից եմ: Չէ՞ որ միայն ազատ արդար և մակարդակով մրցակցության արդյունքում մենք կունենանք երկրի զարգացում և խնդիրների լուծում: Նաև ասաց, որ իշխանությունն ու ոչ իշխանական ուժերը մարդու երկու ձեռքերն են: Այսինքն` այդ երկու համակարգերը միմյանց համար անհրաժեշտ են: Մեկի չգոյությունը տանում է մյուսի լճացմանը: Անալիտիկ կենտրոնի անհրաժեշտությունն էլ ողջունում եմ:
Լուսանկարը՝ Photolure-ի
