Հանրային հեռուստառադիոընկերության խորհրդի նախագահ Ռուբեն Ջաղինյանի համոզմամբ՝ չի կարելի պնդել, որ Հայոց ցեղասպանության հարյուրամյա տարելիցի խորհրդանիշ – անմոռուկի լոգոտիպը գրագողություն է: «Ես կարծում եմ, որ այդ լոգոտիպը, որ ասում եք, ծանոթ էր և շատ տարբեր տեղերում էլ ենք նայել, ուշադրություն ենք դարձրել: Ես էլ եմ մասնակից եղել ինչ-որ մասով, բայց կարծում եմ՝ իր բացատրությունները, ընդհանրապես լոգոտիպի մոտեցումները լրիվ տարբեր են նրանցից, որ եղել են, և որ կան: Այսինքն՝ այն լոգոտիպը որ կա իր բացատրությունով, լրիվ տարանջատված է մնացածից: Ես գրագողությունը բացառում եմ, դա ուրիշ մի նշան է՝ իր բացատրություններով»,- ասաց նա:
Ջաղինյանը համոզված է՝ նշվող լոգոտիպների և իմաստը, և մոտեցումները տարբեր են, դրանք տարբեր նշաններ են, տարբեր բացատրություններ ունեն: Նա նշում է՝ կան նման բաներ, և ոչ միայն այս լոգոտիպի դեպքում, նման բաներ լինում են, բացի այդ, նույն ձևի լոգոտիպ չկա, կան նման լոգոտիպներ՝ մի քիչ ավելի շատ, ավելի քիչ, սակայն այս լոգոտիպը գաղափարախոսությամբ, առանձին գույներով տարբեր է:
Ջաղինյանը դժվարացավ նշել՝ ինչ գումարներ են ծախսվել այս լոգոտիպի ստեղծման համար, սակայն նշեց, որ չի կարծում,
թե շատ մեծ գումարներ են: Հարցին՝ կմիջամտի՞, որ փոփոխության ենթարկվի լոգոտիպը, նա պատասխանեց. «Որպես Շարմ ընկերություն չեմ կարող պատասխանել, որովհետև արդեն մեկ տարի է՝ կապ չունեմ: Անձամբ իմ դուրը գալիս է լոգոտիպը, գաղափարախոսությունը և թե՝ ինչ կերպ է այն ներկայանում, ես կարծում եմ՝ այն պատշաճ մի լոգոտիպ է, որ իր տեղը կունենա»:
Լրագրողներին հետաքրքրում էր՝ գովազդները եթերից հանելու հետևանքով Հանրայինի ֆինանսական մուտքերը նվազել են, այդ բացն ինչ կերպ են լրացնելու: Ջաղինյանը նշեց, որ այս ժամանակահատվածում հանրային հեռուստատեսության ծրագրի փոփոխություններն ապացույց են, որ եթե այդ օգնությունը և հասկացողությունը լինի, իրենք կշարունակեն աշխատել: Ճծտող հարցին՝ արդյոք իրականությանը համապատասխանում են լուրերը, որ Հանրային հեռուստատեսության շենքը գրավադրված է, նա պատասխանեց. «Շենքը չի գրավադրվել, չի դրվել, ոնց կարող է շենքը գրավ դրվել, իհարկե ոչ»:
