ՀՀ փոխվարչապետ, արաբական մի շարք երկրների՝ Արաբական Միացյալ Էմիրությունների, Կատարի, Քուվեյթի, Եգիպտոսի և Իրաքի հետ տնտեսական համագործակցության միջկառավարական հանձնաժողովների համանախագահ Արմեն Գևորգյանի մոտ այսօր կայացած խորհրդակցության ընթացքում քննարկվել են նշված երկրների հետ առևտրատնտեսական հարաբերությունների ներկա մակարդակին, դրանց ընդլայնման ու խորացման հնարավորություններին վերաբերող հարցեր: Հանդիպմանը մասնակցել են Արտաքին գործերի, Էկոնոմիկայի նախարարությունների ներկայացուցիչներ, նշված երկրներում Հայաստանի դեսպանները:
Արձանագրվեց, որ վերջին տարիներին արաբական որոշ երկրների հետ առևտրատնտեսական կապերի զարգացման ուղղությամբ ակտիվություն է նկատվում: Դրական գնահատելով այդ միտումները՝ փոխվարչապետն ընդգծեց հարաբերությունների ընդլայնմանն ուղղված հետևողական քայլերի իրականացման անհրաժեշտությունը: Այդ տեսանկյունից կարևորվեց փոխադարձ հանդիպումների ու այցելությունների կազմակերպումը, արաբական երկրներում անցկացվող տարբեր ցուցահանդեսներին ու տնտեսական միջոցառումներին հայ գործարարների մասնակցությունը: Նշվել է, որ առաջիկայում Հայաստան կայցելեն պատվիրակություններ ԱՄԷ-ից և Եգիպտոսից:
Քննարկվել են նաև երկկողմ իրավապայմանագրային դաշտի ամբողջացման, առևտրատնտեսական կապերի զարգացման համար անհրաժեշտ փաստաթղթերի ստորագրման հետ կապված հարցեր: Տնտեսական հարաբերությունների, զբոսաշրջության զարգացման տեսանկյունից կարևորվեց նաև այդ երկրների հետ ուղիղ օդային հաղորդակցության հաստատման ուղղությամբ աշխատանքների իրականացումը, ինչպես նաև նշվեց, որ ՀՀ կառավարությունը պատրաստ է քննարկել տվյալ երկրների հետ մուտքի արտոնագրային ռեժիմների դյուրացմանը վերաբերող համապատասխան գերատեսչությունների առաջարկությունները: Կառավարությունն աշխատանքներ է իրականացնում նաև արաբական երկրների ապրանքափոխադրումների դյուրացման նպատակով լոգիստիկ նոր հնարավորությունների ստեղծման ուղղությամբ:
Ա. Գևորգյանն ընդգծել է նաև արաբական երկրներում հայ դիվանագետների արդյունավետ աշխատանքը` առևտրատնտեսական հարաբերությունների զարգացման և ընդլայնման համատեքստում: «Տարածաշրջանի երկրների ընկերություններն ու անհատ գործարարներն արդեն մի շարք ծրագրեր են իրականացրել Հայաստանում, կան նաև մեկնարկող նոր ծրագրեր: Հայաստանի կառավարությունը խրախուսում է օտարերկրյա ներդրումների ներգրավումը, և մենք կարևորում ենք մեր դեսպանների՝ բարեկամ երկրների հետ առևտրատնտեսական կապերի զարգացմանն ուղղված աշխատանքները»,- նշել է փոխվարչապետը: Նա նաև ողջունելի է համարել ԱՄԷ-ի՝ Հայաստանում դեսպանատուն բացելու մտադրությունը, ինչը էապես կնպաստի երկկողմ շփումների ակտիվացմանը:
Փոխվարչապետը նաև Էկոնոմիկայի նախարարության, Զարգացման հայկական գործակալության ներկայացուցիչներին առաջարկել է նախատեսվող այցերի ժամանակ արաբ գործընկերներին ներկայացնել կոնկրետ ներդրումային ծրագրեր և կոնկրետ առաջարկություններ:
Քննարկվել են նաև առաջիկայում միջկառավարական հանձնաժողովների նիստերի կազմակերպմանն առնչվող հարցեր:
