ԱՄՆ Կոնգրեսի Ներկայացուցիչների պալատը հավանություն է տվել օրինագծին, որով նախատեսվում է պատժամիջոցների սահմանում մի քանի վենեսուելացի քաղաքական գործիչների դեմ, ովքեր մասնակից են երկրում մարդու իրավունքների խախտմանը: Այս մասին հայտնում է BBC-ն:
Համաձայն օրինագծի՝ մի շարք քաղաքական գործիչների մուտքն ԱՄՆ տարածք կարգելվի, նրանց հաշիվներն ամերիկյան բանկերում կսառեցվեն:
«Ամերիկյան Կոնգրեսը պետք է պատրաստ լինի գործողությունների, երբ խոսքը ողջ աշխահում ազատության և ժողովրդավարության պաշտպանության մասին է»,-խորհրդարանական դեբատների ժամանակ հայտարարել է Իլեանա Ռոս-Լեյտինենը, որը Հանրապետական կուսակցության անդամ է:
Նման մի օրինագիծ էլ անցած շաբաթ հավանության էր արժանացվել ԱՄՆ Սենատի միջազգային հարաբերությունների կոմիտեում:
Օբամայի վարչակազմի անդամները դեմ են հանդես եկել վենսուելացի քաղաքական գործիչների դեմ պատժամիջոցների ներմուծմանը: Նրանք կարծում են, որ դա կհանգեցնի Մադուրոյի և ընդդիմության առաջնորդների միջև լիարժեք երկխոսության հաստատման փորձերի ձախողման:
