Грузия Online-ի փոխանցմամբ`Վրաստանի պաշտպանության նախարարության և ներքին գործերի նախկին նախարար Բաչո Ախալայային այսօր տեղափոխել են Թբիլիսիում գտնվող Գլդանի սկանդալային բանտ:
Երեկ Թբիլիսիի քաղաքային դատարանը Ախալայայի նկատմամբ որպես խափանման միջոց ընտրեց երկամսյա կալանքը` դրանով իսկ մերժելով Ախալայային գրավի դիմաց ազատ արձակելու մասին պաշտպանող կողմի միջնորդությունը:
Հենց Գլդանի բանտը այս տարվա սեպտեմբերին հայտնվեց խոշոր սկանդալի կենտրոնում, ուր կտտանքների էին ենթարկել ու բռնաբարել էին բանտարկյալներին: Այդ սկանդալի և դրան հաջորդած բազմաթիվ ցույցերի հետևանքով Բաչո Ախալայան ստիպված եղավ լքել Վրաստանի ներքին գործերի նախարարի պաշտոնը:
Այժմ նա մեղադրվում է Վրաստանի քրեական օրենսգրքի 333-րդ և 143-րդ հոդվածներով: Դրանցից առաջինը վերաբերում է սեփական լիազորությունների չարաշահմանը, ինչը, մասնավորապես, արտահայտվել է 2011 թվականի հոկտեմբերին նրա կողմից զինծառայողներին բանավոր ու ֆիզիկական վիրավորանքներ հասցնելով: Սրա համար նրան սպառնում է 5-8 տարվա ազատազրկում:
143-րդ հոդվածն էլ առնչվում է ապօրինի ազատազրկելուն, ազատության հանդեպ բռնություն գործադրելուն: Այս հոդվածով Ախալայային սպառնում է 8-12 տարվա ազատազրկում: Ախալայան Վրաստանում ձերբակալվել էր նոյեմբերի 7-ին` Թուրքիայից վերադառնալուց հետո:
