Ֆրանսիայի քաղաքական կյանքի բարեփոխման հանձնաժողովը, որը ստեղծվել է գործող նախագահ Ֆրանսուա Օլանդի կողմից, առաջարկում է թույլ տալ երկրի նախագահին դատել լիազորությունների իրականացման ընթացքում, հաղորդում է RIA Novosti-ն:
Բարեփոխման հանձնաժողովը Օլանդը ստեղծել է այս ամռանը, այն գլխավորում է Ֆրանսիայի նախկին վարչապետ Լիոնել Ժոսպենը:
Հանձնաժողովի կողմից առաջարկվող բարեփոխումները վերաբերում են նաև նախագահի անձեռնմխելիությանը և նախարարների հատուկ կարգավիճակին, որոնց գործողությունները լիազորությունների իրականացման ընթացքում վերահսկվում են Ֆրանսիայի Հատուկ դատարանի կողմից:
Ժոսպենը հայտարարել է, որ հանձնաժողովը փոխել է նախագահի անձեռնմխելիության սկզբունքը, քանի որ երկրի նախագահը չպետք է օրենքից վեր դասվի:
Միևնույն ժամանակ, հանձնաժողովը անհնարին է համարում նախագահի հանդեպ նախնական կալանքի միջոցներ կիրառելը` բացառությամբ այն դեպքերի, երբ պետության ղեկավարի ձերբակալումն իրականացվում է հանցագործության կատարման պահին:
Առաջարկվում է նաև նախարարներին զրկել արտոնություններից չարաշահումների հետ կապված գործերի քննության ժամանակ, որոնք կատարվել են լիազորությունների իրականացման ընթացքում:
Հանձնաժողովն առաջարկում է նաև նոր կանոններ ընդունել, որոնք կարգելեն նախարարներին և խորհրդականներին պաշտոններ զբաղեցնել տեղական ինքնակառավարման մարմիններում:
