«Դո´ւք, այսպես կոչված` անկա՛խ պատգամավոր»,- երեկ Աժ-ում պետական-իրավական հանձնաժողովի նիստին «Ժառանգության» պատգամավոր Զարուհի Փոստանջյանը այսպես դիմեց անկուսակցական պատգամավոր Էդմոն Մարուքյանին:
Aravot.am-ի հետ զրույցում Էդմոն Մարուքյանը վստահեցրեց, որ ընդդիմադիր ուժերն իրեն շանտաժ են անում և շանտաժի միջոցով ուզում են իր անկախ, անկաշկանդ գործունեությունը ճնշել. «Դա իրենց մոտ չի ստացվի, որովհետև կոնկրետ իմ քվեարկությունները կարող են համընկնել մեծամասնության հետ, կարող են համընկնել ընդդիմության հետ: Կարող են չհամընկնել նրանցից որևէ մեկի դիրքորոշման հետ, որը եղել է Օսկանյանի հարցի պարագայում: Հիմա շանտաժային մեթոդներով փորձել այնպես անել, որ ես կողմ խոսեմ իրենց բարձրացրած հարցի մասին, դա պրիմիտիվ միջոց է»:
Զարուհի Փոստանջյանը մեծամասնական ընտրակարգին դեմ արտահայտվելիս նաև ասել էր, որ Էդմոն Մարուքյանը, ճիշտ է, օլիգարխ չէ, բայց ինչ-ինչ պայմանավորվածությունների շնորհիվ է հայտնվել խորհրդարանում:
Էդմոն Մարուքյանի դիտարկմամբ` «Զառան անձամբ գիտի, որ իր ասածը սուտ է: Այսինքն՝ ստելով, սուտ բան ասելով նիստի ժամանակ` չի կարող սևացնել թիվ 30 ընտրատարածքի ընտրողների կամքը, չի կարող նսեմացնել այդ հաղթանակը: Ես նաև հասկանում եմ, որ ընդդիմության ներկայացուցիչները վատ վիճակի մեջ են ընկել այդ ընտրությունների արդյունքում, որովհետև այն հիմնական փաստարկը, որ իրենք ունեին, թե մեծամասնական ընտրակարգով բացառապես միայն օլիգարխներն են անցնում, հիմա չունեն: Թող ասեն, որ ուզում են կուսակցությունները կայանան, դրա համար ուզում են միայն համամասնական, բայց թող չասեն` անցնում են միայն հանցագործները, խուլիգանները, օլիգարխները, կրիմինալները, փողատերերը: Ասում են ու ինձ են նայում: Ես չեմ կարող թույլ տալ, որ այս առումով իմ ընտրողների կամքը որևէ կերպ նսեմացվի: Ես իմ ընտրողներին ճանաչում եմ, իրենք իրենց ընտրողներին ճանաչո՞ւմ են: Ես իմ ընտրողների հետ անընդհատ հանդիպում եմ, ինձ անընդհատ դիմում են, իսկ կուսակցություններ կան, որ մարզերում գրասենյակներ չունեն: Անունը գրասենյակ է, վրան լոգոն կպցրած է, բայց մարդ չկա, որին կարող են դիմեր Այնպես որ… այն, որ ասում են` բերանս մի բաց արեք… այդ դեպքն է: Հանգիստ մնացեք, էլի: Ես անգիր գիտեմ և՛ իշխանության թույլ տեղերը, նաև այն խոսացողների: Զարուհին ինձ դիմում է ու ասում է` այ, դուք, այսպես կոչված` անկախ պատգամավոր: Հիմա ես էլ իրենց դիմեմ ու ասեմ` այ, դուք, այսպես կոչված` ընդդիմադիր պատգամավորնե՞ր: Կան ընդդիմադիրների մեջ նաև այսպես կոչված ընդդիմադիրներ»:
